काठमाडौं । कुवेतको अग्रणी एयरलाइन जजीरा एयरवेजले आफ्नो उडान सेवा थप विस्तार गर्दै ल्याएको छ । एयरवेजले आफ्नो सेवा थप विस्तार गर्दै मध्य–पुर्व, एसिया र युरोपमा पनि आफ्नो उडान सेवा सुरु गरेको छ । जजीराले भैरहवा स्थित नवनिर्मित गौतम बुद्ध अन्तर्राष्ट्रिय विमानस्थलबाट आफ्नो सेवा सुरु गरेको हो ।
यसबाट मध्य–पुर्व र युरोपमा बसोबास गर्ने ठुलो समुदाय नेपालको दक्षिण–पश्चिम क्षेत्रमा प्रत्यक्षरुपमा जोडिने विश्वास लिइएको छ । यो नेपालमा जजीराको दोस्रो उडान सेवा हो, जसले नेपालको तराई क्षेत्रमा बढ्दै गएको यात्रुहरुको आवश्यकतालाई सम्बोधन गरेको छ । जजीराले गौतम बुद्ध अन्तर्राष्ट्रिय विमानस्थलबाट गत जेठ १ गतेबाट उडान सेवा सुरु गरेको हो ।
नयाँ हवाइ रुटको बारेमा बोल्दै जजीरा एयरवेजका उपाध्यक्ष रविन्द्रन भाराथनले यस उडान सेवाले कुवेत र मध्य–पुर्वको सिधा रुट (प्रत्यक्ष धावन मार्ग) ले सेवा दिन नसकेका यात्रुहरुलाई प्रत्यक्ष लाभ पुग्ने बताए ।
उनले भने, ‘जजीरा एयरवेजले निरन्तर आफ्नो सञ्जाल विस्तार गर्दै नयाँ–नयाँ गन्तव्यहरु थप्दै गइरहेको छ । यसले गर्दा कुवेत र मध्य–पुर्वको सिधा रुट (प्रत्यक्ष धावन मार्ग) ले सेवा दिन नसकेका यात्रुहरुलाई प्रत्यक्ष लाभ पुग्नेछ । अब नेपाली एवं विदेशी पर्यटकहरुलाई पनि विदेशबाट सिधैं तराई जान धेरै सहज भएको छ । यो हवाई सेवाले गौतम बुद्धको जन्मस्थल लुम्बिनीमा प्रत्यक्ष उडान सेवा प्रदान गर्नेछ ।’
त्यस्तै, आरआर ग्रुप अफ कम्पनीजको भगिनी संस्था सोसाइटी इन्टरनेशनल ट्राभल सर्भिसेजका चेयरम्यान रवीन्द्र सिंहले यो हवाइ सेवाको विस्तारसँगै नेपालको पश्चिम भागमा ठुलो परिवर्तन ल्याउने दाबी गरेका छन् ।
सिंहले भने, ‘७४ वर्षसम्म काठमाडौंमा मात्रै भर परेको अन्तर्राष्ट्रिय उडान अब यो हवाइ सेवाको विस्तारसँगै नेपालको पश्चिम भागमा ठुलो परिवर्तन ल्याउनेछ । साथै यसले भैरहवाको आन्तरिक पर्यटनमा पनि टेवा पुर्याउनेछ । जसले समग्र नेपालको आर्थिक विकासमा सरोकार राख्छ । यो हामी सम्पूर्ण नेपालीको लागि ऐतिहासिक र गौरवपूर्ण क्षण हो ।’
