काठमाडौँ। गत भदौ २३ र २४ गते देशभर भएका जेनजी प्रदर्शनका क्रममा आगजनी, तोडफोड र अतिक्रमणबाट क्षति पुगेका भौतिक संरचनाको पुनःनिर्माणका लागि सरकारले स्थापना गरेको ‘भौतिक पूर्वाधार पुनःनिर्माण कोष’मा हालसम्म छ करोड २४ लाख रुपैयाँ सङ्कलन भएको छ।
अर्थ मन्त्रालयका प्रवक्ता टङ्कप्रसाद पाण्डेका अनुसार, सोमबार बेलुकासम्म उक्त रकम कोषमा जम्मा भएको हो। जेन–जी प्रदर्शनका क्रममा विभिन्न सार्वजनिक संरचना, सरकारी कार्यालय र स्थानीय निकायमा क्षति पुगेको थियो।
सरकारले गत असोज २८ गते कोषमा आर्थिक सहयोग जुटाउन सर्वसाधारण नागरिक, निजी क्षेत्र, गैरआवासीय नेपाली, विकास साझेदार, दातृ निकाय, उद्यमी तथा विभिन्न सङ्घ–संस्थालाई औपचारिक रूपमा आह्वान गरेको थियो।
सहयोगकर्तालाई प्रोत्साहन गर्न चालु आर्थिक वर्षभरि प्रदान गरिने आर्थिक सहयोग करयोग्य आयमा कटौतीयोग्य खर्चको रूपमा गणना गर्न सकिने व्यवस्था पनि गरिएको छ।
कोषमा सङ्कलित रकम ‘राष्ट्रिय वाणिज्य बैंक’ सिंहदरबार शाखामा खोलिएको विशेष खाता (१९६०१००१०२०७०००४) मार्फत व्यवस्थापन गरिँदैछ।
