हात्तीको आक्रमणबाट वृद्धको मृत्यु

सप्तरी। कोशीटप्पु वन्यजन्तु आरक्ष क्षेत्रबाट निस्केको जगंली हात्तीको आक्रमणबाट बिहीबार एक वृद्धको मृत्यु भएको छ।

मृत्यु हुनेमा जिल्लाको कञ्चनरुप नगरपालिका-५ निवासी ६५ वर्षीय नारायण खंग रहेको इलाका प्रहरी कार्यालय कञ्चनपुरले जनाएको छ।

घरदेखि करिब एक किलोमिटर टाढा रहेको खेतमा काटिएको धान हेर्न गएकाबेला उनलाई जंगली हात्तीले आक्रमण गरेको थियो।

यस्तै, कोशीटप्पु वन्यजन्त आरक्षबाट निस्कने जंगली हात्तीको आक्रमणबाट बर्सेनि दुई/तीन जनाको ज्यान जाने गरेको स्थानीयले बताएका छन्।

हात्ती आक्रमणबाट त्रसित र पीडितले नियन्त्रणको माग गर्दै त्यस क्षेत्रका बासिन्दाले पटकपटक स्थानीय प्रशासन र आरक्ष प्रशासनलाई ज्ञापनपत्र बुझाए पनि ठोस पहल हुन नसकेको स्थानीयको गुनासो छ।