कांग्रेसले प्रतिनिधि सभा पुनर्स्थापना माग गर्दै अदालतमा रिट

काठमाडौं। नेपाली कांग्रेसले प्रतिनिधि सभा पुनर्स्थापना माग गर्दै सर्वोच्च अदालतमा रिट पेस गरेको छ।

प्रमुख सचेतक श्यामकुमार घिमिरे, सचेतक सुशीला थिङसहितले प्रतिनिधि सभा पुनर्स्थापना माग गर्दै आज सर्वोच्चमा रिट पेस गरेका हुन्। यो रिट दर्ता भइसकेको छैन।

‘हामीले प्रतिनिधि सभा पुनर्स्थापनालगायत माग गरेर आज रिट दिएका हौं,’ घिमिरेले भन्नुभयो, ‘निवर्तमान प्रतिनिधि सभा सांसदहरूको हस्ताक्षर वारेसमार्फत् पठाएर पूर्वमहान्यायाधिवक्ता खम्मबहादुर खातीले रिट दिनुभएको हो।’

कांग्रेसका प्रमुख सचेतक घिमिरेसहित विघटित प्रतिनिधि सभाका ८ जना सांसदले सर्वोच्च अदालतमा प्रतिनिधि सभा विघटनविरूद्ध रिट पेस गरेका हुन्।

सर्वोच्च अदालतका सहरजिस्ट्रार तथा प्रवक्ता अर्जुनप्रसाद कोइरालाले विघटनविरूद्ध कांग्रेसका सचेतकसहितले रिट पेस भएको बताउनुभयो। ‘रिट आज पेस भएको छ। अध्ययनको क्रममै छ। दर्ता भइसकेको छैन,’ उहाँले भन्नुभयो।

यसअघि गत शुक्रबार एमाले अध्यक्ष केपी शर्मा ओली र कांग्रेस सभापति शेरबहादुर देउवाबीच महाराजगञ्जमा भेटवार्ता भएको थियो।