विदेशी नेपाली श्रमिकको मताधिकार सुनिश्चित गर्न माग

काठमाडौं। जनपक्षीय ट्रेड युनियन महासङ्घले विदेशमा रहेका करिब ३० लाख नेपाली श्रमिकलाई यसै प्रतिनिधि सभा निर्वाचनमा मताधिकार सुनिश्चित गर्न सरकारसँग माग गरेको छ।

सोमबार महासङ्घका अध्यक्ष कुमार घताने र महासचिव राजेन्द्र सापकोटा नेतृत्वको मजदुर प्रतिनिधिमण्डलले श्रम, रोजगार तथा सामाजिक सुरक्षा मन्त्री राजेन्द्रसिंह भण्डारीलाई ज्ञापनपत्र बुझाउँदै यो माग अघि सारेको हो।

ज्ञापनपत्रमा विदेशमा रहेका श्रमिकको मताधिकार सुनिश्चित गर्नुका साथै मजदुरको न्यूनतम तलब ४० हजार रुपैयाँ, जनविरोधी ट्रेड युनियन ऐन खारेज, र सैनिक, प्रहरी र सरकारी कर्मचारीको तलब दोब्बर गर्नुपर्ने लगायत २३ बुँदे मागहरू समावेश छन्।

महासङ्घले सरकारले यी जनपक्षीय मागहरू समयमै सम्बोधन नगरे आन्दोलन गर्न बाध्य हुने चेतावनी पनि दिएको छ। विज्ञप्तिमा भनिएको छ, “उपरोक्त मागहरू नेपाली समाजको दीर्घकालीन सामाजिक–आर्थिक रूपान्तरणसँग प्रत्यक्ष रूपमा सम्बन्धित छन्। यदि सरकारले ठोस कदम नचाले, शान्तिपूर्ण तर प्रभावकारी आन्दोलन अघि बढाउन बाध्य हुनेछौँ।”