मलेसियाले तोक्यो विदेशी श्रमिक ल्याउने विशेष समयावधि

काठमाडौं। मलेसियाले २०२५ का लागि विदेशी श्रमिक ल्याउन चाहने रोजगारदाताहरूलाई जनवरी १९ देखि मार्च ३१ सम्मको विशेष समयावधि दिने निर्णय गरेको छ। यसले नेपालसहित स्रोत देशहरूबाट श्रमिक ल्याउने बाटो खुलाउनेछ।

गत वर्षको अक्टोबर १ देखि डिसेम्बर ३१ सम्म विदेशी श्रमिक ल्याउन मलेसियाले अनुमति दिएको थियो। गृह मन्त्रालयको मंगलबारको विज्ञप्तिअनुसार, यस पटक सरकारले स्वीकृत गरेका सबै क्षेत्र तथा उपक्षेत्रमा यो विशेष समयावधि लागू हुनेछ।

गृह मन्त्रालयले जनाएको छ, जनवरी १९ देखि मार्च ३१ भित्र प्राप्त हुने सबै आवेदन सम्बन्धित अनुगमन मन्त्रालयसँग परामर्श गरी कानुनी नियम र शर्तअनुसार मूल्यांकन गरिनेछ।

त्यसैगरी, रोजगारदातालाई एजेन्ट वा तेस्रो पक्षमार्फत होइन, वन–स्टप सेन्टर मार्फत सिधै आवेदन दिन गृह मन्त्रालयले पुनः आग्रह गरेको छ।