ट्रम्प भन्छन्ः सजिलो होस् वा कठिन, ग्रीनल्याण्ड प्राप्त गर्छौं

अमेरिकी राष्ट्रपति डोनाल्ड ट्रम्पले संयुक्त राज्य अमेरिकाले ग्रीनल्याण्ड प्राप्त गर्नका लागि सजिलो वा कठिन तरिकाले सम्झौता गर्ने बताउनुभएको छ। ह्वाइट हाउसले ग्रीनल्याण्डका बासिन्दाहरूलाई अमेरिकामा सामेल हुन सहमत गराउन पैसा तिर्नेबारे विचार गरिरहेको भन्ने सञ्चार माध्यमको रिपोर्टबारे सोधिएको प्रश्नमा ट्रम्पले आफू अहिले ग्रीनल्याण्डका लागि पैसाको बारेमा कुरा नगरिरहेको बताउनुभयो।

अमेरिकी सञ्चार माध्यमकाअनुसार अमेरिकाका लागि डेनिस राजदुत जेस्पर मोलर सोरेन्सन र अमेरिकाका लागि ग्रीनल्याण्डका प्रतिनिधि प्रमुख ज्याकोब इबोसेथसेनले बिहीवार ह्वाइट हाउसका अधिकारीहरूसँग भेट गरेका थिए।

ह्वाइट हाउसले एक विज्ञप्ति जारी गर्दै ट्रम्पको ग्रीनल्याण्डको मागका सन्दर्भमा अमेरिकी सेनाको उपयोग सधैं एक विकल्प रहेको बताएको छ । ग्रीनल्याण्ड र डेनमार्क दुवैले यो टापु विक्रीको लागि नभएको स्पष्ट पारेका छन्।