रिमा विश्वकर्मा रास्वपाको समानुपातिक सूचीमा नाम यथावत

काठमाडौं। कलाकार रिमा विश्वकर्मा राष्ट्रिय स्वतन्त्र पार्टी (रास्वपा)को समानुपातिक सूचीमा यथावत् रहनुभएको छ।

रास्वपाले आइतबार अद्यावधिक गरेको समानुपातिक उम्मेदवारहरूको बन्दसूचीमा उहाँको नाम यथावत् राखिएको छ। कलाकार विश्वकर्मा दलित क्लस्टरतर्फ महिलाको पहिलो नम्बरमा हुनुहुन्छ।

शनिबार रास्वपासँग एकता गरेको उज्यालो नेपाल पार्टी अलग्गिएपछि रास्वपाले निर्वाचन आयोग गएर बन्दसूची अद्यावधिक गरेको थियो। त्यसमा विश्वकर्माको नाम यथावत राखिएको हो।

विश्वकर्मा उज्यालो नेपाल पार्टीको केन्द्रीय समिति सदस्य हुनुहुन्थ्यो। पार्टी रास्वपाबाट अलग भएपछि त्यस पार्टीका एक नेताले विश्वकर्मालाई उज्यालो पार्टीले बनाइरहेको समानुपातिक सूचीमा समेट्ने विषयमा सोधेका थिए। जबाफमा विश्वकर्माले आफू समानुपातिक सूचीमा नरहने, प्रत्यक्षमा उम्मेदवारी दिनसक्ने बताउनुभएको थियो।