नेकपानिकट अखिलले शंकरमा विस्तार गर्यो जेनजी फोर्स

काठमाडौं। नेकपा निकट अनेरास्ववियूले काठमाडौंस्थित शंकरदेव क्याम्पसमा विशेष भेला आयोजना गरी “अखिल GEN Z Force” गठन गरेको छ।

संगठनभित्र नवयुवालाई आकर्षित गर्दै नवीन सोच, सिर्जनशीलता र ऊर्जाशील नयाँ पुस्तालाई संगठित गर्ने उद्देश्यका साथ उक्त संरचना निर्माण गरिएको हो।

आगामी दिनमा संगठनलाई अझ सशक्त, गतिशील र प्रभावकारी बनाउने लक्ष्यसहित इन्जिनियर युवराज शाहीको संयोजकत्वमा १५१ सदस्यीय अखिल GEN Z Force कमिटी गठन गरिएको छ।

कमिटीमा नरदेव उपाध्याय, राजु मेहेता, अभिषेक सिंह, लविन तामाङ, साजन रानाभाट, आशिका थापा मगर, सुदिप खड्का र अनुप ढकाल सह–संयोजक रहेका छन्। सह–संयोजकहरूलाई प्रदेशगत जिम्मेवारी प्रदान गरिएको अनेरास्ववियूले जनाएको छ।

अनेरास्ववियू केन्द्रीय कमिटीद्वारा आयोजित उक्त भेलाको अध्यक्षता संगठनका अध्यक्ष महेश श्रेष्ठले गर्नुभएको थियो। भेलामा नेपाली कम्युनिस्ट पार्टीका नेता मोहन गौतम प्रमुख अतिथिका रूपमा सहभागी हुनु भएको थियो भने पार्टीका नेता जीवन राई र यशु लामा अतिथिका रूपमा उपस्थित रहनु भएको थियो। उनीहरूले कार्यक्रममा आफ्ना धारणा र शुभकामना मन्तव्य राख्नुभएको थियो।

अनेरास्ववियूका उपाध्यक्ष अशोक थापाका अनुसार, अखिल GEN Z Force गठनसँगै संगठनले नयाँ पुस्ताको सहभागिता बढाउँदै वैचारिक, संगठनात्मक र आन्दोलनात्मक पक्षलाई अझ सुदृढ बनाउने दिशामा महत्वपूर्ण कदम चालेको छ।