सिन्धुली–२ मा महेश्वर दाहालद्वारा राजनविरुद्ध बागी उम्मेदवारी

काठमाडौँ । आगामी फागुन २१ गते हुने प्रतिनिधि सभा निर्वाचनमा सिन्धुली क्षेत्र नम्बर–२ मा महेश्वर दाहालले बागी उम्मेदवारी दिनुभएको छ ।

नेकपामा आबद्ध दाहालले टिकट वितरणमा असन्तुष्टि देखाउँदै बागी उम्मेदवारी दिनुभएको छ।

सो क्षेत्रमा नेकपाका तर्फबाट लेखनाथ दाहाल ‘राजन’ लाई उम्मेदवार बनाएको थियो । टिकट वितरणमा असन्तुष्टि व्यक्त गरेका जिल्ला संयोजक र इञ्चार्ज सहितको टिमको सहयोगमा महेश्वर दाहालले उम्मेदवारी दर्ता गर्नुभएको छ।

नेकपाबाट विद्रोह गरेर सिन्धुली–२ मा उम्मेदवार महेश्वरको प्रस्तावकमा नेता हरिबोल गजुरेल, समर्थकमा जिल्ला संयोजक पानीराज बम्जन रहनुभएको छ।

उहाँलाई नेकपा जिल्ला इन्चार्ज बसन्त माझी सहित केन्द्रीय सदस्यहरू तथा जिल्ला कमिटीका पदाधिकारी र सदस्यहरूको साथ रहेको छ । उहाँहरू उम्मेदवारी दर्ताको समयमा पनि उपस्थित रहनुभएको छ।

यसअघि मंगलबार मात्र नेकपा सिन्धुली संयोजक बम्जनले टिकट वितरणमा भएको कमजोरी सच्याउन माग गर्दै विज्ञप्ति समेत जारी गरेको थियो ।