वीर अस्पतालले गर्‍यो बिमामार्फतको सेवा कटौती

काठमाडौँ।  वीर अस्पतालले स्वास्थ्य बिमामार्फतको सेवालाई व्यापक कटौती गरेको छ।

विशेषगरी यसअघि वीर अस्पतालबाट बिमामार्फतको सेवा लिने विरामीलाई चिकित्सकले सिफारिस गर्ने औषधि तीन महिनाका लागि दिइने औषधि अबदेखि एक महिनाका लागि मात्रै दिने अस्पतालले जनाएको छ।

यस विषयमा अस्पतालले निकालेको सूचनामा भनिएको छ‚ ‘ यसअघि बिमाबाट दिइने औषधि तीन महिनाका लागि उपलब्ध गराइरहेकोमा विशेष कारणवश त्यस्ता औषधि मिति २०८२ फागुन १ गतेदेखि अर्को व्यवस्था नभएसम्म एक महिनाका लागि मात्र बिमित सदस्यहरूलाई उपलब्ध गराइनेछ।’

अस्पतालका अनुसार बिमामार्फतको दावी भुक्तानी अस्पतालले लामो समयदेखि पाएको छैन। जसले गर्दा अहिले वीर अस्पतालले ४० करोड जति रकम बिमामार्फतको सेवा दिएबापत बिमा बोर्डबाट लिनु पर्ने छ।

वीर अस्पताल बिमामार्फतको विशिष्टीकृत सेवा दिने सबैभन्दा ठूलो सरकारी अस्पताल हो।

यता बिमा बोर्डले भने केही समयअघि बिमामार्फतको सेवामा भएको अनियमितालाई हटाउन र आर्थिक संकटलाई नियन्त्रण गर्न भन्दै ओपिडी सेवामा २५ हजारभन्दा बढी सेवा लिने लगायतका निर्णय गरेको छ।