पोखरा । तनहुँ रत्न सम्मानबाट तनहुँ सम्पर्क समाज पोखराका आजीवन सदस्य तथा समाजसेवी फणिनारायण पोख्रेल सम्मानित भएका छन् । तनहुँ सम्पर्क समाज पोखराद्वारा स्थापित उक्त सम्मान समाजको २०औं स्थापना दिवसको अवसरमा शुक्रबार प्रदान गरिएको हो ।
नगद १० हजार रुपैयाँ र ताम्रपत्र सहित सम्मान गरिएको समाजले जनाएको छ । तनहुँको साविक राइपुर गाउँ पञ्चायतका वडा अध्यक्ष, उपप्रधानपञ्च हुँदै प्रधानपञ्चसम्म करिब १५ वर्ष नेतृत्व गरेका ८१ वर्षीय पोख्रेल शुक्लागण्डकी नगरपालिका वडा नं. ११, राइपुर स्थायी ठेगाना भई २०५५ सालदेखि पोखरा ७, माछापुच्छ्रेटोलका अस्थायी बासिन्द हुन् । पोख्रेललाई तनहुँ सम्पर्क समाज पोखरा स्थापनाका साथै तनहुँबासीको सुखदुःखमा पु¥याएको योगदानको उच्च कदर गर्दै उक्त सम्मान प्रदान गरिएको समाजले जनाएको छ ।
समाजका अध्यक्ष अम्बिका प्रसाद भट्टराईको अध्यक्षतामा तथा प्रा.डा. बुद्धिबहादुर थापाको प्रमुख आतिथ्यतामा कार्यक्रम भएको हो ।
२०५९ सालमा स्थापित समाजले विभिन्न दैविक प्रकोप एवं मानवीय सहयोग गर्दै आइरहेको छ । वित्तीय कारोबारका लागि आफ्ना सदस्यद्वारा मातृभूमि बचत तथा ऋण सहकारी संस्था लि. समेत स्थापना गरेको छ ।
समाजका निवर्तमान अध्यक्ष शिवराज पौडेलको संयोजकत्वमा कोषाध्यक्ष जगन्नाथ गौतम र कार्यसमिति सदस्य चित्रबहादुर अधिकारीको ३ सदस्यीय छनौट समितिले पोख्रेललाई सम्मान गर्न सिफारिस गरेको थियो ।