भारतको ओडिसास्थित केआईआईटी कलेजमा मृत भेटिएकी प्रकृतिको घर ल्याएर गरियो अन्त्येष्टि

काठमाडौँ। भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा मृत्यु भएकी नेपाली विद्यार्थी प्रकृति लम्सालको गृहजिल्ला रुपन्देही ल्याएर अन्त्येष्टि गरिएको छ ।

उनको शव गएराति १२ बजे रुपन्देहीको सिद्धार्थननगर नगरपालिका ८ स्थित बैंकरोड कोलोनीमा ल्याइएको थियो । त्यसपछि स्वर्गद्वारी घाटमा लगेर अन्त्येष्टि गरिसक्दा आज विहीबार बिहान चार बजेको थियो ।
रुपन्देही प्रहरीका सूचना अधिकारी डीएसपी सुरज कार्कीले भने, ‘आज बिहान करिब चार बजे अन्त्येष्टि सकियो । अहिले यहाँको स्थिति नर्मल छ ।’

डीएसपी कार्कीका अनुसार प्रकृतिको शव ओडिसाबाट गोरखपुरसम्म हवाईजहाजमा र गोरखपुरबाट घरसम्म गाडीमा ल्याइएको थियो ।