महिलामन्त्रीले भने : महिलाको सम्मान नहुने घर ‘नरक’ हो

काठमाडौँ। महिला, बालबालिका तथा ज्येष्ठ नागरिकमन्त्री नवलकिशोर साह सुडीले महिलाको सम्मान नहुने घर ‘नरक’ सरह हुने टिप्पणी गरेका छन्।

शनिबार काठमाडौंमा ११५ औं अन्तर्राष्ट्रिय महिला दिवस मुल समारोहलाई सम्बोधन गर्दै उनले यस्तो बताएका हुन्। उनले महिलाको आदर नहुने घरमा कहिल्यै पनि श्री नहुने बताए। उनले आफ्नो छोरी रानी र अरुको छोरी नोकरानी जस्तो व्यवहार कसैले गर्न नहुने बताए।

उनले छोरीसरह स्नेह दिनसके आमासरह माया पाउने पाउने बताए। पुरुष र महिलामा कानुनी रुपमा कुने विभेद नभए पनि व्यावहारिक रपमा अझै कायम रहेको जिकिर गरे। यसलाई हटाउन सरकार लागिरहेको उनको भनाइ छ।

मन्त्री सुडीले भने, ‘जुन घरमा महिलाको सम्मान छैन, आदर छैन, त्यो घर नरक हो। त्यो घरमा कहिले पनि श्री हुन सक्दैन। लक्ष्मीको वास हुन सक्दैन। तर यो पनि ध्यान राख्नुपर्छ। हाम्रो छोरी रानी, अरुको छोरी नोकरानी गर्नु हुँदैन। यदी तपाईं आफ्नो घरमा श्री हेर्न चाहना राख्नुहुन्छ भने अरुको छोरी पनि रानी बनाउनुपर्छ। आमाले छोरीलाई खान नदिने, वर्तन धुहाउन लगाउने काम हुन्छ तर छोरालाई मजाले ऐस आराम गर्न दिने। यदी तपाईं आफ्नो बुहारीलाई छोरी समान मान्नुहुन्छ भने उसले पनि आमा मान्छ।’