बोहोराको शोकमा राप्रपाले ३ दिन आधा झन्डा झुकाउने

काठमाडौँ। राप्रपाका वरिष्ठ नेता दीपक बोहोराको शोकमा राप्रपाले ३ दिन पार्टीको झन्डा आधा झुन्डाउने भएको छ। राप्रपाको आज बसेको पदाधिकारीको आकस्मिक बैठकले ३ दिनसम्म पार्टीका कुनै पनि औपचारिक कार्यक्रम नगर्ने निर्णय लिएको छ।

पार्टीले निकालेको शोक मन्तव्यमा बोहोराको निधनबाट पार्टीलाई अपुरणीय क्षति भएको जनाएको छ। प्रतिनिधिसभा सदस्य समेत रहेका बोहोराका आज दिउँसो काठमाडौँको ओम अस्पतालमा निधन भएको थियो।

पार्टीका प्रवक्ता मोहन श्रेष्ठका अनुसार वरिष्ठ नेता बोहोराको पार्थिव शरिरलाई अन्तिम श्रद्धाञ्जलीका लागि चैत २० गते बुधबार दिउँसो २:०० बजेदेखि पार्टी केन्द्रीय कार्यालय चाबहिलमा राखिनेछ।बोहोराको बुधबार नै पशुपति आर्यघाटमा अन्तिम संस्कार गरिनेछ।