लगातार हार व्यहोरिरहेको चेन्नईको कप्तानमा धोनी

काठमाडौँ। चेन्नई सुपर किंग्सको कप्तानमा फेरि महेन्द्रसिंह धोनी फर्किएका छन्। रुतुराज गायकवाड चोटका कारण आईपीएलबाट बाहिरिएपछि चेन्नईको कप्तानी अब धोनीले गर्ने भएका हुन् ।

एएनआई र पीटीआईका अनुसार गायकवाड कुहिना भाँचिएका कारण प्रतियोगिताबाट बाहिरिएका छन् । चेन्नईका बाँकी खेलहरूमा एमएस धोनीले कप्तानी सम्हाल्ने छन् । चेन्नई सुपर किंग्सका प्रशिक्षक स्टीफन फ्लेमिङले बिहीबार यसको पुष्टि गरेका छन् ।

अहिलेसम्म चेन्नईले पाँच खेलमध्ये एउटा मात्र खेल जित्न सकेको छ। दश टोलीको सूचीमा चेन्नई नवौँ स्थानमा छ । शुक्रबार चेन्नई सुपर किंग्स र कोलकाता नाइट राइडर्सबीच खेल हुनेछ ।