लुम्बिनी प्रदेशसभा सदस्य गीता गुरुङ पदमुक्त

काठमाडौं। लुम्बिनी प्रदेशसभा सदस्य गीता गुरुङ पदमुक्त भएकी छन्। गुरूङ जनमत पार्टीबाट लुम्बिनी प्रदेश सभामा समानुपातिक सांसद बनेकी थिइन्। यसअघिका प्रदेश सभा बैठकमा पनि अत्यन्त न्यून उपस्थित हुने गुरुङ पछिल्ला ११ वटा बैठकमा लगातार अनुपस्थित भएपछि संविधान र नियमावलीअनुसार उनको पद रिक्त भएको घोषणा गरिएको हो।

नेपालको संविधानको धारा १८० को खण्ड घ मा प्रदेश सभालाई सूचना नदिई लगातार दश वटा बैठकमा अनुपस्थित रहने प्रदेशसभा सदस्यको पद रिक्त हुने प्रावधान रहेको छ। सोही प्रावधान अनुसार गुरूङको पद रिक्त गरिएको हो।

लुम्बिनी प्रदेश सभामा गुरूङ सबभन्दा कम उपस्थित हुने प्रदेश सभा सदस्यमध्ये पर्छिन्। यसअघिका पाँचौं अधिवेशनसम्मका ८३ वटा बैठकमध्ये ३४ वटा बैठकमा मात्र उपस्थित भएकी गुरूङ छैटौं अधिवेशनमा भने एउटा बैठकमा पनि उपस्थित भएकी छैनन्। छैटौं अधिवेशनमा बुधवारसम्म ११ वटा बैठक बसेका छन्।

लुम्बिनी प्रदेश सभामा जनमत पार्टीका संसदीय दलका नेता चन्द्र केश गुप्ता ९सिके० ले प्रदेशका सभामुख तुलाराम घर्ती मगरलाई पत्र पठाउँदै सांसद गुरूङ लगातार १० वटा बैठकमा अनुपस्थित भएकाले संविधानअनुसार पद रिक्त घोषणा गर्न अनुरोध गरेका थिए।