काठमाडौं। राष्ट्रिय प्रजातन्त्र पार्टी (राप्रपा) मा अध्यक्ष राजेन्द्र लिङदेनले एकपछि अर्का नेतालाई भूमिकाविहीन बनाउँदै पदमुक्त गर्न थालेपछि तिक्तता बढेको छ। सबै नेतालाई समेट्न नसकेको, आफ्नो गुटलाई प्रश्रय गरेको र राजावादी आन्दोलनलाई अघि बढाउन नसकेको आरोप खेपिरहेका बेला लिङदेनले पार्टीमा लामो समय बिताएका नेताहरूको पद खोस्न थालेपछि खैलाबैला मच्चिएको हो।
राप्रपामा यसअघिबाटै लिङदेन र अर्कातिर महामन्त्री धवलशमशेर जबरा गुटमा विभाजित छन्। पछिल्लो ताका लिङ्देनले राप्रपाको प्रवक्ताबाट सगुनसुन्दर लावतीलाई हटाएपछि धवल पक्ष आक्रामक छ। धवलपक्ष लिङदेनविरुद्ध लड्न भेलामा समेत लागेको छ। लावती लामो समयदेखि राप्रपामा रहेका नेता हुन्। उनी राप्रपाका पुराना नेता पद्मसुन्दर लावतीका छोरा समेत हुन्।
यति मात्र नभई यसअघिको महाधिवेशनमा लिङदेनलाई अध्यक्षमा जिताउन उनी लागेका थिए। तर, अहिले तिनै लिङदेनले आफूखुसी प्रवक्ताबाट हटाएको इतरपक्षका नेताहरू सुनाउँछन्। यति मात्र होइन, यसअघि राजतन्त्र स्थापनाका लागि गठित समितिका संयोजक नवराज सुवेदीलाई समेत भूमिकाविहीन बनाएका गुनासो राप्रपामा बढेको छ।
सुवेदीले यसअघि राजसंस्थाको पुनःस्थापनाका लागि बनेको समितिको संयोजन गर्न पार्टीबाट राजीनामा दिएको अभिव्यक्ति दिएका थिए। तर, उनले राप्रपामा लिखित राजीनामा भने दिएका छैनन्।
सुवेदी राप्रपा वरिष्ठ नेता साथै अनुशासन आयोगका अध्यक्ष थिए। एकाएक सुवेदीको नाम नै नलिई लिङदेनले सोही जिम्मेवारी आफूनिकट रोशन कार्कीलाई दिएका छन्। राप्रपा प्रवक्ता मोहन श्रेष्ठले निकालेको विज्ञप्तिमा सोही आयोगमा कार्कीलाई नियुक्त गरिएको छ भने लावतीलाई निकालिएको छ। राप्रपा इतरका नेताहरूका अनुसार संस्थापनले पेल्न थालेपछि आन्तरिक बैठकमा जुट्न थालेका छन्।
पार्टीको संशोधित विधानमा अध्यक्षले सिधै कारवाही गर्न पाउने व्यवस्था नरहेको ती नेताको भनाइ छ । उनले भने, ‘अहिलेको व्यवस्था अनुसार अध्यक्षले कारवाहीका लागि अध्यक्षले केन्द्रीय समितिमा प्रस्ताव लैजानुपर्छ र केन्द्रीय समितिले निर्णय गर्नुपर्छ । अध्यक्षले सिधै कसैलाई पनि पदमुक्त गर्न सक्नुहुन्न ।’
संस्थापन पक्षले भने नवराज सुबेदीलाई हटाइएको उनले आफैं पार्टी परित्याग गरेको हुँदा अनुशासन विभाग अध्यक्ष पद खाली रहेको तर्क गरेको थियो । संस्थापनइतर पक्षले भने उनी राप्रपामै रहेको दावी गरेको छ ।
आफूले नेतृत्व गरेको जनआन्दोलन निस्कर्षमा पुर्याउन नसकेपछि सुबेदी अहिले राप्रपामै रहने मनस्थितिमा रहेको स्रोत बताउँछ । राजीनामा नदिएको र पार्टीले उनलाई हटाउने निर्णय पनि नगरेकाले सुबेदी राप्रपाको केन्द्रीय कार्यसम्पदन समितिको बैठकमै उपस्थित हुन वाधा नरहेको संस्थापन इतर पक्षको तर्क छ ।
सुबेदी र लावतीमाथ गरिएको कारवाही विरुद्ध भोलि निर्वाचन आयोगमा उजुरी गर्न जाने संस्थापन इतर पक्षका केन्द्रीय सदस्यले जानकारी दिए । पार्टी महामन्त्री डा. धवलशम्शेर राणाको संयोजनमा उनकै टंगाल स्थित सचिवालयमा संस्थापन इतर नेताहरु भेला भएका हुन् । भेलामा १० पदाधिकारीसहित र ५० केन्द्रीय सदस्यको सहभागीता रहेको एक नेताले जानकारी दिए ।
पार्टीका पूर्व अध्यक्ष तथा निर्देशक समितिका अध्यक्ष डा. प्रकाशचन्द्र लोहनीको भेलामा सहभागीता थियो । यस्तै, उपाध्यक्षहरु विक्रम पाण्डे, मुकुन्दश्याम गिरी, महामन्त्री डा। राणा, कुन्ती शाही, प्रवक्ता (हटाइएका) सगुनसुन्दर लावती, सहायक प्रवक्ता प्रवीनकुमार थोकर तामाङ, सहायक महामन्त्री प्रेम बलायर, ऋषिराज देवकोटा, सैरेन्द्र बहादुर शाह लगायत भेलामा सहभागी थिए।
किन क्रुर बन्दैछन् लिङदेन?
एउटै समूहमा रहेर महाधिवेशन लडेका लिङदेन र राणा विभाजित बने। इतरपक्षले लिङदेनको कार्यशैलीले गर्दा विभाजित भएको बताउने गरेको छ।
लिङदेनले पार्टीका निर्णय एकलौटी गर्ने र सामूहिक निर्णयलाई नमान्ने कारण गुट बनेको बुझाइ इतरपक्षको छ। यसअघि प्रचण्ड नेतृत्वको मन्त्रिपरिषद्मा सामेल हुँदा समेत लिङदेन आफै सहभागी भएपछि असन्तुष्टि बढेको थियो। धवलपक्षले सरकारमा जान नहुने गए पनि अध्यक्ष जान नमिल्ने अडान राख्दाराख्दै लिङदेन ऊर्जामन्त्री बनेका थिए। इतरपक्षले लिङदेन स्वार्थ समूहका परिबन्दमा परेर सरकारमा गएको बताएको छ।
यसपछि राजसंस्था पुनः स्थापनका लागि गठित सुवेदी नेतृत्वको समितिका विषयमा पनि लिङदेन असन्तुष्ट रहेका थिए। यसअघि धवल समेतको संगठन विभाग प्रमुखको जिम्मेवारी लिङदेनले खोसेका थिए। धवल क्यान्सर रोगको उपचारका लागि भारत गएका बेला उनको जिम्मेवारी खोसिएको थियो।
यसपछि इतरपक्षले धवलको जिम्मेवारी खोसिनुको कारण समेत केन्द्रीय बैठकमा राखेको थियो। यसपछि पनि लिङदेनले इतरपक्षमापथि कारबाही गरिनै रहे। इतरपक्ष नेतालाई जिम्मेवारी नदिने र समन्वय नगर्ने जस्ता काम भएको नेताहरू सुनाउँछन्।
यसअघि राजतन्त्र पुनःस्थापनाको आन्दोलनको नेतृत्व लिङदेन आफैले गर्न चाहेका थिए। तर राजावादी भेला पुराना नेता नवराज सुवेदीलाई दिए पछि लिङदेन इखिएका थिए। यता इतरपक्ष भने सुवेदी नेतृत्वमा आन्दोलन जानुपर्ने अडान थियो। पछिल्लो ताका लिङदेन पक्षीय नेता भने सुवेदी एक्सपायर नेता भएको बताउँदै आएका छन्। यसैबाट दुईपक्षबीच तिक्तता बढेको नेताहरूको बुझाइ छ।
लिङदेन र धवलबीच अब भने प्रष्ट दुई धारमा देखिएको छ। यसअघिसम्म प्रष्टरूपमा विभक्त नभएका उनीहरू अब औपचारिकरूपमै एकअर्काबीच असन्तुष्टि जनाउन थालेका छन्।
