विवादमा तानिएपछि भूमिमन्त्रीले भने : अडिओ सार्वजनिक गरेर आफ्नो चरित्र हत्या गरियो

काठमाडौं। भूमि व्यवस्था, सहकारी तथा गरिबी निवारण मन्त्री बलराम अधिकारीले घुस लिएको भन्दै अडिओ सार्वजनिक गरेर आफ्नो चरित्र हत्या गर्न खोजिएको बताएका छन्।

३२ लाख घुस रकम लिएको दाबीसहित नयाँ अडिओ क्लिप बाहिरिएपछि शुक्रबार पत्रकार सम्मेलन गर्दै उनले कास्कीको मालपोत अधिकृतको सरुवाका लागि केही व्यक्ति मन्त्रालयमा आएको र आफूले त्यसलाई नमान्दा अहिले अडिओ सार्वजनिक गरेर चरित्र हत्या गरिएको दाबी गरे।

‘यो शुद्ध चरित्र हत्या गर्ने प्रयास हो,’ मन्त्री अधिकारीले भने, ‘आफ्नो अभिष्ट पुरा गर्न खोजेका व्यक्तिहरुले त्यो पुरा गर्न मालपोत अधिकृतलाई सरुवा गराउन मन्त्रालय आएका थिए। मैले हुन्न भनेपछि यी कुरा आए।’

उनले आफू छानबिनका लागि खुला भएको समेत उल्लेख गरे। ‘म छानबिन गर्ने कुरामा खुला छु किनभने म संलग्न छैन। बोलेकै छैन, चिनेकै छैन,’ मन्त्री अधिकारीले भने।