अर्थमन्त्रीमाथि माओवादीको गम्भीर आरोप, रातारात करका दर हेरफेर गरेको विषय संसद्मा उठ्यो

काठमाडौं। माओवादी नेता एवं पूर्व अर्थमन्त्री वर्षमान पुनले सरकारले स्वार्थ प्रेरित ढङ्गले करका दर हेरफेर गरेको बताएका छन् । शुक्रबारको संसद्मा बोल्दै सांसदले पास गरेको विधेयकका करका केही दरहरू संसदलाई जानकारी नदिई आफूखुसी परिवर्तन गरिनुले नियतमाथि प्रश्न उठेको बताएका हुन् ।

पुनका अनुसार सरकारले किसमिसलगायतका सुख्खा फलफूल, औषधी राख्ने बट्टा, सलाइका काँटीलगायतका केही शीर्षकमा करका दल घटाएको छ । यसले नेपालमै उत्पादन हुने फलफूलको मूल्य प्रभावित हुने उनले बताए । कार्यपालिकालाई केही विशेष अवस्थामाबाहेक करका दल हेरफेर गर्ने अधिकार नभएको उनेकाे भनाइ छ ।

अहिले संसद चलिरहेको अवस्थामा संसद छलेर अर्थमन्त्रीले करका दर हेरफेर गरेको आरोप उनले लगाए । उनले अर्थमन्त्रीकाे कार्यक्षमतामा समेत प्रश्न उठाए । पहिलो चाैमासिकभित्रै करका दर हेरफेर गरिनुमा अर्थमन्त्रीको असक्षमता वा बदनियतमध्ये एक भएको तर्क गरे ।

याे विषयमा सरकारले संसदलाई जवाफ दिनुपर्ने पुनको माग छ ।