काठमाडौँ । चलचित्र ‘सोल्टिनी’ आगामी कात्तिक ६ गतेदेखि प्रदर्शन हुने भएकाे छ ।
निर्माण युनिटले शुक्रबार चलचित्रका ५ पोष्टर एकसाथ सार्वजनिक गर्दै चलचित्रको प्रदर्शन मितिबारे जानकारी दिएको हो ।
प्रकाश सपुत र परीक्षा लिम्बु अभिनित चलचित्रको कार्यकारी निर्माताको रूपमा ‘हर्क साम्पाङ रिभोलुसन एन्ड टिम’ रहेको छ । यस समूहको नेतृत्व धरान महानगरपालिकामा मेयर हर्क साम्पाङले गरेका हुन् ।
अर्जुन सुवेदी निर्देशित चलचित्रमा विल्सन विक्रम राई, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडा लगायतका कलाकारको अभिनय छ ।
समाजमा व्याप्त अमानवीयता र जातीय भेदभावका विरुद्ध आवाज उठाउने प्रेमकथामा चलचित्र बनेको हो । इलामको इलामबजार, बिब्ल्याँटे, कन्याम, बिर्तामोड, पथरी र भोजपुरका रमणीय दृश्यहरूमा छायाङ्कन गरिएको छ ।
फिल्ममा सङ्गीत प्रशान्त सिवाकोटी, हर्कुलस बस्नेत, छायाङ्कन सुशन प्रजापतिको छ । प्लानेट थ्री फिल्म्स र योलो इन्टरटेन्मेन्टको सहकार्यमा बनेको फिल्मका निर्माता रेजिना बिस्ट र संसार चौलागाईँ हुन् भने रोशन चौलागाईँ, वसन्त कटुवाल र सुजन अधिकारी सह निर्माता रहेका छन् ।
