थाइल्यान्डकी प्रधानमन्त्री पदमुक्त

काठमाडौँ। थाइल्यान्डको संवैधानिक अदालतले प्रधानमन्त्री पैतोंगटार्न शिनावात्रालाई पदमुक्त गर्दै उनको मन्त्रिपरिषद् विघटन गरेको छ। योसँगै २००८ पछि संवैधानिक अदालतद्वारा पदच्युत हुने उनी पाँचौँ प्रधानमन्त्री बनेकी छिन्।

कम्बोडियाका पूर्वप्रधानमन्त्री हुन सेनसँगको उनको फोनवार्ता सार्वजनिक भएपछि विवाद चर्किएको थियो। यो विवादका कारण उनलाई गत जुलाईमा निलम्बन गरिएको थियो।

शिनावात्रा थाइल्यान्डको इतिहासमै सबैभन्दा कम उमेरमा प्रधानमन्त्री बनेकी नेत्री हुन्। उनले ३७ वर्षको उमेरमा प्रधानमन्त्रीको पद सम्हालेकी थिइन्। उनी देशकी दोस्रो महिला प्रधानमन्त्रीसमेत बनेकी थिइन्।

यसअघि उनकी काकी यिङलक शिनावात्रा २०११ देखि २०१४ सम्म प्रधानमन्त्री बनेकी थिइन्।

शिनावात्रा थाई व्यवसायी र पूर्वप्रधानमन्त्री थाकसिन शिनावात्राकी छोरी हुन्। उनले थाइल्यान्डका उत्कृष्ट विद्यालयमा शिक्षा प्राप्त गरेकी थिइन्। त्यसपछि उनले बेलायतको सरे विश्वविद्यालयमा अध्ययन गरेकी थिइन। त्यसपछि उनले परिवारकै ‘रेनन्डे’ होटल समूहसँग काम सुरू गरेकी थिइन्।

शिनावात्रा आफ्नो उपनाम ‘उङ इंग’ नामले पनि चिनिन्छन्। उनले २०२१ मा फ्यु थाई पार्टीमा प्रवेश गरेकी थिइन् र २०२३ मा पार्टी नेतृत्व बनेकी थिइन्।

गत वर्ष थाई संसदले उनका पूर्ववर्ती स्रेत्था थाविसिनको स्थानमा प्रधानमन्त्री चयन गरेको थियो। थाविसिनलाई संवैधानिक अदालतले मन्त्रिपरिषद् नियुक्ति नियमल उल्लंघन गरेको अभियोगमा पदच्युत गरेको थियो।