`फरक मत´लाई सचिवालयमा पेस गर्दै एमाले, विधान महाधिवेशन लाने-नलाने निर्णय गर्ने

काठमाडौँ नेकपा एमालेका महासचिव शङ्कर पोखरेलले दुई उपाध्यक्षको फरक मत सचिवालय बैठकले टुङ्ग्याउने बताएका छन् ।

बुधबार च्यासलमा आयोजित पत्रकार सम्मेलनमा बोल्दै पोखरेलले ६ साउनमा पार्टीले पूर्वराष्ट्रपति विद्यादेवी भण्डारीलाई सदस्यता नदिन गरेको निर्णयप्रति फरक मत राखेको कुरा सार्वजनिक भएको हुँदा यसबारे कुरा उठे छलफल हुने बताएका हुन् ।

वरिष्ठ उपाध्यक्ष ईश्वर पोखरेल र उपाध्यक्ष सुरेन्द्र पाण्डेले भण्डारीलाई पार्टी सदस्य दिनुपर्ने धारणा राख्दै आएका छन्, जुन पार्टी निर्णयविपरीत छ । तर, स्थायी कमिटी सदस्य कर्ण थापाले उठाएका विधानबारे धारणामा भने ‘छलफल हुन सक्ने तर कसरी आउँछ त्यसमा भर पर्ने’ महासचिव पोखरेलको भनाइ छ ।

विधान महाधिवेशनकेन्द्रित फरक प्रतिवेदन पेस हुने तयारी बारेको खबर बारे ‘अनुमानको भरमा अहिले नै बाेल्न उचित नहुने’ पोखरेलको तर्क थियो ।

प्रचार विभाग प्रमुख राजेन्द्र गाैतमले विधान महाधिवेशनमा २ हजार २६ जना प्रतिनिधि र अन्य गरी २ हजार ३ सय ४१ काे सहभागीता हुने जानकारी दिए । ललितपुरकाे गाेदावरीमा हुने महाधिवेशनकाे सम्पूर्ण तयारी पुरा भएकाे उनकाे भनाइ थियाे ।

विधान महाधिवेशन २० भदौदेखि २२ गतेसम्म ललितपुरमा हुँदै छ ।