बिदा भए आईजी थापा, अब प्रहरी कमान्ड खापुङको काँधमा

काठमाडौँ। प्रहरी महानिरीक्षक (आईजीपी) दीपक थापाले ३० वर्षे सेवा अवधि पूरा गरी आजबाट अवकाश पाएका छन् । उनीसँगै अतिरिक्त प्रहरी महानिरीक्षक (एआईजी) टेकबहादुर तामाङ र सुदीप गिरीले पनि अवकाश पाए ।

आईजीपी थापासहित एआईजीद्वय गिरी र तामाङलाई प्रहरी प्रधान कार्यालय, नक्सालमा आयोजित विशेष समारोहमार्फत नवनियुक्त प्रहरी महानिरीक्षक चन्द्रकुबेर खापुङले बिदाइ गरे । कार्यक्रममा उच्च प्रहरी अधिकृत, कर्मचारी तथा थापाका परिवारजन उपस्थित थिए ।

त्यसअघि गृहमन्त्री रमेश लेखकले पनि पूर्वआईजीपी थापालाई गृह मन्त्रालयमा बिदाइ गरेका थिए । मन्त्री लेखकले थापाको दीर्घ सेवाप्रति धन्यवाद ज्ञापन गर्दै आगामी जीवनका लागि शुभकामना व्यक्त गरे ।

नवनियुक्त आईजीपी चन्द्रकुबेर खापुङले बिहीबारदेखि नेपाल प्रहरीको ३२औँ महानिरीक्षकका रूपमा कमान्ड सम्हाल्नेछन् ।