बदन भण्डारीमाथिको आक्रमण राजनीति इस्युमा गरियो, दोषीलाई कारबाही गरियोस् : रास्वपा

काठमाडौँ। राष्ट्रिय स्वतन्त्र पार्टीले आफ्नो केन्द्रीय सार्वजनिक मामिला विभागका सचिव बदन भण्डारीमाथि भएको आक्रमणको निन्दा गर्दै दोषीलाई कारबाही गर्न माग गरेको छ ।

बुधबार राति काठमाडौंको कपनस्थित प्रगति चोकमा भण्डारीमाथि सांघातिक आक्रमण भएको रास्वपा र्‍यापिड रेस्पोन्स टिमका संयोजक प्रदीप तिमल्सेनाले विज्ञप्तिमार्फत जनाएका छन् । उनका अनुसार, कपनमा रहेको कार्यालयबाट राति ८ः४५ बजे घर जाने क्रममा नम्बर प्लेट छोपिएको मोटरसाइकलमा आएका तीन जनाको समूहले भण्डारीको टाउकोमा फलामको रडले प्रहार गरेका हुन् ।

रड प्रहारबाट भण्डारीको टाउकोमा दश टाँका लगाउनुपरेको र उनको शरीरभर निलडाम रहेको तिमल्सेनाले बताएका छन् । ‘स्थानीय प्रत्यक्षदर्शीका अनुसार, आक्रमणकारीको पञ्जाबाट फुत्केर भागेका कारण भण्डारीले ज्यान जोगाउन सफल भएका थिए’, बिहीबार जारी विज्ञप्तिमा भनिएको छ, ‘आक्रमणकारीहरूको योजना र घटनाको प्रकृतिले ज्यान लिने उद्देश्यले नै आक्रमण भएको प्रस्ट हुन्छ ।’

विज्ञप्तिमा जनाइएअनुसार, नारी टीभीमा केही समयअघि दिएको अन्तर्वार्तालाई कारण बनाएर भण्डारीलाई निरन्तर धम्की आइरहेको थियो । घटनालाई निन्दनीय भन्दै तिमल्सेनाले तत्काल छानबिन गरी दोषीलाई कारबाही गर्न माग गरेका छन् ।