होटलको प्रारम्भिक क्षति २५ अर्ब: हान

काठमाडौं। सोमबारको जेन-जी आन्दोलनपछि मंगलबार प्रदर्शनमा उत्रिएका प्रदर्शनकारीले देशभरका होटल उद्योगमा ठूलो क्षति पुर्‍याएका छन्।

नेपाल होटल संघ (हान) ले दिएको प्रारम्भिक तथ्यांकअनुसार कम्तीमा २५ वटा होटल, रिसोर्ट, लज र रेष्टुरेन्टमा क्षति पुगेको छ। यसरी तोडफोड र आगजनीमा परेको सम्पत्तिको अनुमानित मूल्य २५ अर्ब रुपैयाँ बराबर रहेको छ।

हानका अनुसार सबैभन्दा धेरै होटल व्यवसाय काठमाडौं र पोखरामा क्षति भएका छन्। यी दुई शहरपछि भैरहवा, बुटवल, धनगढी, झापा, दाङ, बर्दिबासलगायतका क्षेत्रमा पनि होटल उद्योग प्रभावित भएका छन्।

आगजनी र तोडफोडका कारण करिब २ हजारभन्दा बढी कामदार प्रत्यक्ष प्रभावित भएको अनुमान गरिएको छ। प्रभावित होटलहरु यस सिजनमा सञ्चालनमा आउन नसक्ने हानको भनाइ छ।

प्रारम्भिक विवरणअनुसार क्षति भएका होटलमध्ये करिब ६० प्रतिशतले बीमाबाट आंशिक क्षतिपूर्ति पाउने सम्भावना रहेको संघले जनाएको छ।