हजारौं हात, आँसु र प्रेरणासँग फेरि उठ्नेछौं: भाटभटेनी

काठमाडौं- प्रतिष्ठित चेन स्टोर भाट-भटेनीका २१ वटा स्टोरमा भएको आगलागी, तोडफोड र चोरीले सञ्चालक मिन बहादुर गुरुङ र उनका कर्मचारीहरूलाई गहिरो पीडामा डुबाएको छ।

तर ध्वस्त स्टोर र खरानीमा परिणत भएको सम्पत्तिबिच पनि भाटभटेनी परिवारको मनोबल अझ बलियो बनेर उठ्ने उद्घोष गरेको छ ।‘दुःखद क्षणहरू गुज्रिए, तर आशा हराएको छैन,’ भाटभटेनीले फेसबुक पेजमा भावुक हुँदै लेखेको छ ‘आगलागीले केवल भौतिक सम्पत्ति नष्ट गर्‍यो, तर नेपाली समुदायको माया, सहयोग र समर्थनले हाम्रो आत्मबल बढाएको छ ।’

भाटभटेनीमा स्थानीय हजारौं सहयोगी हातहरूले पसल सफा गर्न मद्दत गरिरहेका छन् । कर्मचारी परिवारलाई फेरि उठ्न प्रेरित गरिरहेका छन्।

मिनबहादुर गुरुङ सञ्चालक रहेको भाटभटेनीले भनेको छ, ‘तपाईंहरूको शब्द, तपाईंहरूको साथ, तपाईंहरूको माया नै हाम्रो ठूलो बल हो । भाट-भटेनी परिवारले पुनर्निर्माणमा ढिलाई गर्ने छैन । हामी फेरि उभिनेछौं । तपाईंहरूको साथमा, भविष्यलाई अझ उज्यालो बनाउनेछौं ।’

आगलागीपछि देखाइएको सहानुभूति, सहकार्य, र समुदायको माया परिवारका लागि ठूलो प्रेरणाको स्रोत बनेको कम्पनीले जनाएको छ । शुक्रबारको तथ्यांक अनुसार देशभरका २७ भाट-भटेनी शाखामध्ये २१ शाखा आगजनी र तोडफोडबाट प्रभावित भएका छन् ।

सीईओ पानु पौडेलका अनुसार, १२ शाखा आगलागीबाट पूर्णरूपमा नष्ट भएका छन्। आगलागीबाट पूरै ध्वस्त भएका शाखाहरूमा काठमाडौं उपत्यकाका टंगाल, महाराजगन्ज, बौद्ध, कोटेश्वर, बालुवाटार वेयरहाउस, पोखरा, चितवन, हेटौंडा, बिराटनगर, धरान, बिर्तामोड र दमक पर्छन्।

तोडफोड र लुटपाट भएका शाखाहरूमा काठमाडौ उपत्यकाका कलंकी, ठिमी, बलाजु, जनकपुर, बुटवल, वीरगन्ज, धनगढी, इटहरी र भैरहवा छन्।

भाटभटेनीका ७ शाखा सुरक्षित रहेको कम्पनीले जनाएको छ। जस्मा टोखा, सातदोबाटो, अनामनगर, सानागाउँ, त्रिपुरेश्वर, पाटन र नेपालगञ्जका शाखामा कुनै क्षति भएको छैन।

प्रभावित १२ शाखा मुख्य कारोबार गर्ने शाखा थिए, जसले दैनिक कम्तीमा ५ करोड रुपैयाँ बराबरको कारोबार गर्थे। कम्पनीका अनुसार, भाटभटेनीमा करिब १० हजार नेपाली काम गर्छन्, जसमध्ये करिब ५ हजार कर्मचारी प्रभावित शाखामा कार्यरत थिए। आन्दोलनका कारण उनीहरूको रोजगारी र आम्दानीमा ठूलो संकट आएको छ।

कम्पनीले प्रारम्भिक रूपमा नोक्सानीको मूल्याङ्कन विवरण संकलन गर्न कम्तीमा २–४ हप्तासम्म समय लाग्ने जनाएको छ।

ध्वस्त स्टोर र क्षतिपूर्तिको चुनौतीका बाबजुद, भाट-भटेनी परिवारले पुनर्निर्माणमा आफ्नो दृढ अठोट प्रकट गरेको छ। ‘हामी फेरि उभिनेछौं। तपाईंहरूको साथमा, भविष्य उज्यालो बनाउनेछ।’