जेनजी आन्दोलन :निजी क्षेत्रको कतिको सम्पत्ति र संरचना ध्वस्त भए?

काठमाडौं। निजी क्षेत्रले सरकारसँग सुरक्षा, समन्वय र सहकार्यको माग गर्दै अर्थतन्त्रको पुनर्निर्माण तथा पुनरूत्थानका लागि आवश्यक सहयोग गर्न अनुरोध गरेको छ।

आइतबार प्रधानमन्त्री सुशिला कार्कीसँग भएको छलफलमा नेपाल उद्योग वाणिज्य महासंघका अध्यक्ष चन्द्रप्रसाद ढकालले आन्दोलनका क्रममा निजी क्षेत्रले ठूलो जनधनको क्षति व्यहोरेको भन्दै तत्काल प्रभावकारी कदम चाल्नु पर्नेमा जोड दिनुभयो।

महासंघको प्रारम्भिक तथ्यांक अनुसार हालसम्म निजी क्षेत्रमा करिब ८० अर्ब रूपैयाँ बराबरको क्षति भएको देखिएको छ।

अझै देशभरका उद्योग, व्यवसाय र साना उद्यमका क्षति विवरण संकलन भइरहेको र ठूलो उद्योग तथा राजधानी बाहिरका व्यवसायहरूको पूर्ण विवरण आउन बाँकी रहेको अध्यक्ष ढकालले बताउनुभयो।

निजी क्षेत्रले अर्थतन्त्रमा ८१ प्रतिशत योगदान गर्दै ८६ प्रतिशत रोजगारी सिर्जना गरिरहेको अवस्थामा यसलाई सुरक्षित राख्न सरकार जिम्मेवार हुनुपर्ने उहाँले बताउनुभयो।