तुइन खोलामा पहिरो खसेपछि प्रशासनले भन्यो : बाटो तत्काल खुल्दैन, वैकल्पिक बाटो रोज्नुहोला

चितवन। नारायणगढ–मुग्लिङ सडक खण्डमा आज ठूलो पहिरो खस्दा आवागमन पूर्णरूपमा बन्द भएको छ। पहिरो ठुलो भएकाले तत्काल सडक खुल्ने सम्भावना नरहेको जिल्ला प्रशासन कार्यालय चितवनले जनाएको छ ।

सडक अवरुद्ध भएपछि जिल्ला प्रशासन र सुरक्षाकर्मीहरूले यात्रु तथा सवारी धनीहरूलाई वैकल्पिक मार्ग प्रयोग गर्न आग्रह गरेका छन् । वैकल्पिक मार्गका रूपमा महोत्तरीको बर्दिवास, मकवानपुरको हेटौँडा, रुपन्देहीको बुटवल, नवलपरासी (बर्दघाट सुस्ता पूर्व) को कावासोती र गैँडाकोट, धादिङको नौबिसे तथा तनहुँतर्फ जाने यात्रुका लागि खैरेनीटारमार्ग प्रयोग गर्न सुझाव दिइएको छ ।

प्रशासनले यात्रा अघि सडकको अवस्था बुझेर मात्र यात्रा गर्न र यात्रामा समस्या परेमा खटिएका ट्राफिक प्रहरी, नेपाल प्रहरी तथा सशस्त्र प्रहरीसँग सहयोग लिन आग्रह गरेको छ ।

प्रशासनले जोखिम मोलेर यात्रा समेत नगर्न आग्रह गरेको छ । आफ्नो ज्यान बचेमा पछि पनि यात्रा गर्न सकिने जारी सूचनामा उल्लेख गरिएको छ ।