प्रधानमन्त्रीसँग महेश श्रेष्ठ नेतृत्वको एनआरएनएको छलफल

काठमाडौं। महेशकुमार श्रेष्ठ नेतृत्वको गैरआवासीय नेपाली संघ(एनआरएनए)ले अन्तरिम सरकारकी प्रधानमन्त्री सुशीला कार्कीसँग छलफल गरेको छ ।

जेन—जी आन्दोलनपछि ध्वस्त भएका संरचनाको पुर्ननिर्माणका सन्दर्भमा प्रधानमन्त्रीसँगै मन्त्रीहरुसँग छलफल गरेको संघका अध्यक्ष श्रेष्ठले जानकारी दिनुभयो।

पुनर्निर्माणमा संघले सरकारसँग सहकार्य गर्नेगरी छलफल गरिएको उहाँको भनाई छ । संघले हाल प्रहरीसँग सहकार्य गरेर ट्राफिक कन्ट्रोल रुम निर्माण गरिरहेको बताउनु भयो । त्यसबाहेक अरुपनि परियोजना निर्माण गर्ने सन्दर्भमा संघका पूर्वअध्यक्ष शेष घलेसहित आफुहरु सरकारसँग सहकार्य गर्न तयार रहेको उहाँको भनाई छ ।

उहाँले भन्नुभयो, ‘विशेष गरेर पुनर्निर्माणमा गैरआवासीय नेपाली संघले कसरी सहयोग गर्न सकिन्छ भन्ने विषयमा छलफल
केन्द्रित रहेको थियो । तत्कालका लागि हामीले प्रहरीसँग सहकार्य गरेर ट्राफिक कन्ट्रोल रुम बनाउँदैछौँ । त्यसबाहेक अरुपनि एउटा परियोजना उहाँहरुले दिनुभयो भने हामीले गर्ने भनेर पूर्वअध्यक्ष शेष घलेले पनि आफ्ना कुरा राख्नुभयो, पनि राख्यौँ । गैरआवासीय नेपाली संघ र उहाँहरुको टिम मिलेर कुनै एउटा राम्रो प्रोजेक्ट गर्ने पुनःनिर्माणको लागि भन्ने कुरामा छलफल भयो ।’

संघका पूर्वअध्यक्ष कुल आचार्यले गैरआवासीय नेपाली नागरिकतालाई छिटो कार्यन्वयनमा ल्याउन सरकारसँग आग्रह गरेको जानकारी दिनुभयो । उहाँले पुनर्निर्माणमा विदेशमा रहेका नेपालीहरुले सहयोग गर्ने पनि बताउनु भयो । छलफलमा प्रधानमन्त्रीसंगै अर्थमन्त्री रामेश्वर खनाल, भौतिक पूर्वाधार तथा यातयात, जलस्रोत तथा उर्जा र शहरी विकासमन्त्री कुलमान घिसिङ,संघका पूर्वअध्यक्ष शेष घले लगायतको उपस्थिति रहेको थियो । –न्युज एजेन्सी नेपाल