टिचिङ पुगेर सञ्चारमन्त्री खरेलले भेटे जेन-जी आन्दोलनका घाइते

काठमाडौं। सञ्चार तथा सूचना प्रविधिमन्त्री जगदीश खरेलले जेन-जी आन्दोलनका क्रममा घाइते भएकाहरुसँग भेट गर्नुभएको छ ।

शुक्रवार मध्यान्ह सञ्चारमन्त्री खरेल त्रिवी शिक्षण अस्पताल पुगेर जेन-जी आन्दोलनका क्रममा घाइते भएकाहरुलाई भेट्नुभएको हो । गत भदौ २३ र २४ गते भएको जेन-जी आन्दोलनका क्रममा ७४ जनाको ज्यान गएको थियो ।

आन्दोलनमा गोली लागेर सयौँ घाइते भएका छन् । आन्दोलनकै उपलब्धिस्वरुप तत्कालीन केपी शर्मा ओली सरकार पतन भयो र अन्तरिम सरकारकी प्रधानमन्त्रीको रुपमा सुशीला कार्की नियुक्त हुनुभएको छ । कार्की मन्त्रीपरिषद्मा सञ्चारमन्त्रीको रुपमा खरेल नियुक्त हुनुभएको छ ।

मन्त्री नियुक्त भएको केही दिनपछि उहाँले शुक्रवार जेन-जी आन्दोलनका घाइतेहरुसँग भेट गरेर उहाँहरुको स्वास्थ्यस्थितिबारे जानकारी लिनुभएको हो । साथै घाइतेहरुको स्वास्थ्यलाभको कामनासमेत गर्नुभयो।

घाइतेहरुसँगको भेटपछि सञ्चारकर्मीहरुसँग उहाँले घाइतेहरुको उपचारमा सरकारले कुनै कसर बाँकी नराख्ने र जेन-जीको चाहनाअनुसार आफूले काम गर्ने प्रतिवद्धता जनाउनुभएको छ । -न्युज एजेन्सी नेपाल