एसिया कप २०२५ को उपाधिका लागि भारत र पाकिस्तान भिड्ने

काठमाडौं। एसिया कप २०२५ को उपाधिका लागि भारत र पाकिस्तान भिड्ने भएका हुन्। बिहीबार सुपर-४ को खेलमा पाकिस्तानले बंगलादेशलाई पराजित गरेसँगै भारत र पाकिस्तानबीच उपाधि भिडन्त पक्का भएको हो।

आइतबार युएईको दुबई अन्तर्राष्ट्रिय क्रिकेट मैदानमा  एसिया कपको ४० वर्षको इतिहासमा भारत र पाकिस्तानबीच उपाधिका लागि प्रतिस्पर्धा हुन लागेको हो। सन् १९८४ मा सुरू भएको एसिया कपमा भारत र पाकिस्तानले यसअघि समूह चरणसहितका खेलमा प्रतिस्पर्धा गरे पनि फाइनलमा भने कहिल्यै भिडेका थिएनन्।

यो अवधिमा १६ संस्करणका एसिया कप सकिदा भारतले आठ पटक उपाधि जितेको छ भने पाकिस्तान दुई पटक च्याम्पियन बनेको छ। भारतले पछिल्लो पटक २०२३ मा उपाधि जित्दा पाकिस्तानले सन् २०१२ यता उपाधि जित्न सफल भएको छैन।

अर्को रोचक पक्ष त भारत र पाकिस्तान एकै प्रतियोगितामा तेस्रो पटक प्रतिस्पर्धा हुन लागेको हो। यसअघि भारत र पाकिस्तान समूह चरणमा भिडेका थिए। सो खेलमा भारतले ७ विकेटको सहज जित निकालेको थियो। सुपर-४ को खेलमा पनि भारत र पाकिस्तानबीच प्रतिस्पर्धा हुँदा भारत फेरि हाबी भयो। भारतले ६ विकेटले सहजै खेल जितेर फाइनलमा स्थान बनायो।

सन् २००७ यता भारत र पाकिस्तानबीच टी-२० अन्तर्राष्ट्रिय खेलमा १५ पटक प्रतिस्पर्धा भएको छ। जसमा भारतले ११ खेलमा जित निकालेको छ। पाकिस्तान भने तीन पटक विजयी भएको छ। एक खेल भने बराबरीमा सकिएको छ। -एजेन्सी