धेरै शो पाउने फिल्म बन्यो ‘हरिबहादुरको जुत्ता’

काठमाडौं । दशैंको फूलपातीमा रिलिज हुँदा ‘हरिबहादुरको जुत्ता’ले कूल १३४ शो पाएको थियो । प्रदर्शनको सातौं दिनसम्म हरिवंश आचार्य स्टारर फिल्मको कूल शो संख्यामा खासै भिन्नता छैन ।

यो फिल्मको कूल शो संख्या आइतबार ११७ शो छ । यसको अर्थ- यो फिल्मले स्थिर ब्यापारलाई निरन्तरता दिइरहेको छ भन्ने हो ।

दशैंको फूलपातीमा सँगै रिलिज भएका अन्य दुई फिल्म बलिदान र माइतीघरलाई हलले क्रमशः २४४ र १४४ शोज दिएका थिए । सातौं दिनसम्म यी दुईको शोज संख्या घटेर क्रमशः १०७ र ७७ शोज देखिएको छ ।

शोजको यो अंकगणितअनुसार सातौं दिनसम्म ‘हरिबहादुरको जुत्ता’ सर्वाधिक शो पाउने फिल्म बनेको छ । रिलिजको सुरुवाती दिनमा अकुपेन्सी कम भएको अडिटोरियम पाएको यो फिल्मले सातौं दिनसम्म आइपुग्दा उच्च शो पाएको छ।