रसायनशास्त्रमा नोबेल पुरस्कार आज घोषणा हुँदै

काठमाडौं। रोयल स्विडिस एकेडेमी अफ साइन्सेजले आज (बुधबार) रसायनशास्त्रतर्फको यस वर्षको नोबेल पुरस्कार घोषणा गर्ने भएको छ।

सन् १९०१ देखि २०२४ सम्म रसायनशास्त्रमा १९५ जना वैज्ञानिकलाई ११६ पटक नोबेल पुरस्कार प्रदान भइसकेको छ। गत वर्षको पुरस्कार सियाटलस्थित वासिङ्टन विश्वविद्यालयका बायोकेमिस्ट डेभिड बेकर र लन्डनस्थित ब्रिटिस–अमेरिकी आर्टिफिसियल इन्टेलिजेन्स संस्था गुगल डिपमाइन्डका डेमिस ह्यासाबिस र जोन जम्परलाई दिइएको थियो। उनीहरूले नयाँ प्रोटिनहरू डिकोड र डिजाइन गर्ने प्रविधि विकास गरेको योगदानको लागि सम्मान पाएका थिए।

यस वर्षको नोबेल पुरस्कार श्रृङ्खलामा सोमबार चिकित्साशास्त्र, मङ्गलबार भौतिकशास्त्र, बिहीबार साहित्य, शुक्रबार नोबेल शान्ति र आगामी सोमबार अर्थशास्त्र पुरस्कार घोषणा हुने तालिका तय छ।

नोबेल पुरस्कार वितरण समारोह डिसेम्बर १० मा हुनेछ, जुन दिन पुरस्कारका संस्थापक अल्फ्रेड नोबेलको पुण्यतिथीसँग मेल खान्छ।