तरकारीको मूल्यमा अस्वाभाविक बृद्धि

काठमाडौ। काठमाडौंको कालिमाटी तरकारी बजारमा अविरल वर्षापछि हरियो साग र तरकारीको मूल्य अस्वाभाविक रूपमा बढेको छ। पहिरो र सडक अवरुद्ध हुँदा उपत्यकामा तरकारी पर्याप्त रूपमा भित्रिन सकेन। सामान्यतया २०० रुपैयाँ प्रतिकिलो पर्ने तरकारी अहिले ६०० रुपैयाँसम्म पुगेको छ।

बजार व्यवसायी रामकृष्ण दुवालका अनुसार दशैँअघि दैनिक तीन–चार हजार केजी तरकारी आइरहन्थ्यो, तर अहिले मात्र दुई–तीन क्विन्टल बजारमा आइरहेको छ। धनिया ८००, पालक ३००, गोलभेडा १०० रुपैयाँ प्रतिकिलो पुगेको छ। आपूर्ति कम र माग बढी भएकाले मूल्य दोब्बरभन्दा बढी बढेको उनको भनाइ छ।

वर्षाका कारण ग्रामीण क्षेत्रबाट तरकारी ढुवानी रोकिँदा स्थानीय बासिन्दाले पनि साग–तरकारी पर्याप्त रूपमा पाउन सकेका छैनन्।