माओवादीसँगको एकताबारे झलनाथ : बेमौसमको बाजा नबजाऔँ, पार्टी पुनर्गठनमा लागौँ

काठमाडौं। नेकपा एकीकृत समाजवादीका सम्मानित नेता झलनाथ खनालले अहिले कुनै पार्टीसँग एकता गर्ने बेला नरहेको बताउनुभएको छ। जेनजी आन्दोलनका क्रममा आगोमा जलेर घाइते भएकी पत्नी रविलक्ष्मी चित्रकारको उपचारका क्रममा दिल्लीमा रहनुभएका खनालले अहिले पार्टी पुनर्गठन र रूपान्तरण समय रहेको बताउनुभएको हो।

“सबैतिर सर्वत्र पुनर्गठन र रूपान्तरणको माग उठिरहेको छ । यो युगको माग हो, यो समयको माग हो, यो जनताको माग हो र यो सिंगो राष्ट्रको मागसमेत हो । यो फगत पुस्तावादको माग होइन, सबै पुस्ताको क्रान्तिकारी पुनर्गठन र रूपान्तरणको माग हो,” उहाँले भन्नुभएको छ, “त्यसलाई अस्वीकार गरेर कोही अघि जान सक्दैन । कमरेडहरू, यतिबेला हाम्रो पार्टीको निम्ति कसैसँग पनि पार्टी एकीकरण गर्ने मौसम होइन र छैन ।”

एकीकृत समाजवादी र नेकपा माओवादी केन्द्र बीच एकताको चर्चा हुँदै आएका बेला खनाल विपक्षमा उभिनुभएको छ । पूर्वप्रधानमन्त्रीसमेत रहनुभएका खनालले सत्तामा रहेका र सत्तामा सहभागी सबै पार्टीका नेतृत्वले मुलुकलाई सही दिशा दिन नसकेकामा जिम्मेवारी लिनैपर्ने बताउनुभएको छ।

‘मुलुकलाई सही दिशा दिने भनेको राजनीतिले र आजको अवस्थामा राजनीतिक पार्टीले नै हो । हामी अहिले बहुदलीय प्रणालीमा छौँ । दलबाहेक कसैले पनि जनता र मुलुकलाई सही बाटो देखाउन सम्भव हुँदैन । त्यसमाथि वामपन्थी दलले नै आमजनता र राष्ट्रलाई सही मार्ग देखाउनुपर्ने हो,’ उहाँले भन्नुभएको छ ।

उहाँले एमालेबाट चार वर्षअघि गरिएको विद्रोहको समीक्षा गर्नुपर्ने पनि उल्लेख गर्नुभएको छ। “ठिक बेठिक के गर्‍यौँ, दुध र पानी छुट्याऊँ । हामीले नवौँ राष्ट्रिय महाधिवेशनदेखि नै उठाएको युवा आवाज र कार्यविधिको कुरालाई ध्यान दिऊँ । हाम्रै पार्टी भित्रका युवाहरूको आवाज अनुरूपसमेत पार्टीलाई सही वैचारिक, राजनीतिक कार्यदिशा, नीति र सिद्धान्तका आधारमा पुनर्गठन गरौँ, पार्टीलाई आमूल परिवर्तनकारी र नेपाली विशेषताको समाजवादका निम्ति दृढ संकल्पित पार्टीमा रूपान्तरण गरौँ, यही दिशाका आधारमा सकेसम्म सबै क्रान्तिकारी कम्युनिष्ट, वामपन्थी, देशभक्त र प्रगतिशील शक्तिहरूलाई गोलबन्द गरौँ,” खनालले भन्नुभएको छ।