विपिन जोशीको शवको डीएनए परीक्षण, चल्दैछ नेपाल ल्याउने प्रक्रिया

इजरेलमा नेपाली विद्यार्थी विपिन जोशीको शवको जाँच र त्यसबाट निकालिएको नमुनाबाट डीएनए परीक्षण गरिएको काठमाण्डूस्थित परराष्ट्र मन्त्रालय स्रोतले बीबीसीलाई बताएको छ।

“इजरेली पक्षबाट डीएनए परीक्षण भइसकेको छ। यद्यपि आधिकारिक रूपमा भन्नलाई केही प्रक्रिया पूरा गर्नुपर्ने भएर उहाँहरूले औपचारिक जानकारी दिन बाँकी छ,” स्रोतले भन्यो।

हमासले जोशीसहित चार जनाको अवशेष सोमवार इजरेली पक्षलाई हस्तान्तरण गरेको थियो। इजरेली सेनाले हमासले फिर्ता पठाएका शवमध्ये विपिन जोशीको पनि भएको पुष्टि गरेको छ। आईडीएफले गाजा युद्धको प्रारम्भिक महिनातिरै “नेपाली विद्यार्थी विपिन जोशीको बन्धक अवस्थामै हत्या भएको हुन सक्ने” जनाएको छ।

आईडीएफका अनुसार राष्ट्रिय विधिविज्ञान केन्द्रले जोशीको मृत्युको परिस्थितिसम्बन्धी परीक्षण सम्पन्न गरेपछि उनको विषयमा अन्तिम निष्कर्ष निकालिने छ।