झनै खस्कियो नेपाली पुरुष फुटबल टोलीको वरीयता

काठमाडौं । फिफा वरियतामा नेपाली पुरुष फुटबल टोली ४ स्थान तल झरेको छ । विश्व फुटबलको सर्वोच्च निकाय फिफाले शुक्रबार सार्वजनिक गरेको नयाँ वरियता अनुसार नेपाल १८०औं स्थानमा खस्किएको हो ।

नेपालले गएको ९ अक्टोबर र १४ अक्टोबरमा भियतनामसँग एसियन कप छनोट खेलेको थियो जहाँ दुवै खेलमा पराजित भएको थियो ।

दक्षिण एसियाको शीर्षमा रहेको भारतको वरियता पनि खस्किएको छ। भारत २ स्थान तल झर्दै १३६औं स्थानमा पुगेको छ भने भुटान ३ स्थान खस्किएर १८९औं स्थानमा पुगेको छ ।

बंगलादेश १ स्थान माथि उक्लिएर १८३औं स्थानमा पुग्दा माल्दिभ्स २ स्थान तल झर्दै १७३औं स्थानमा पुगेको छ । श्रीलंका ४ स्थान माथि उक्लिएर १९३औं स्थानमा छ ।

शीर्ष वरियतामा स्पेन कायमै रहँदा अर्जेन्टिना तेस्रोबाट दोस्रोमा उक्लिएको छ । फ्रान्स तेस्रोमा झरेको छ ।