एसियाली ‘युथ गेम्स’मा नेपालका सात खेलाडी सहभागी

काठमाडौं। तेस्रो एसियाली ‘युथ गेम्स’मा नेपालबाट विभिन्न पाँच खेलमा सात खेलाडीले प्रतिस्पर्धा गर्ने भएका छन्।  यो प्रतियोगिता बहराइनमा कात्तिक ५ देखि १४ गतेसम्म सञ्चालन हुने छ। नेपालबाट ब्याडमिन्टन, गल्फ, जुडो, मुवाँथाई र पौडी गरी पाँच खेलमा सहभागीता रहनेछ।

नेपालको तर्फबाट ब्याडमिन्टनमा सविना श्रेष्ठ, गल्फमा रुवेन थापा, जुडोमा समिता नेपाली, मुवाँथाईमा पलेस्था कक्षपति र गेन्जी राई, तथा पौडीमा अथर्व सिंह र आर्या महर्जन प्रतिस्पर्धा गर्ने छन्।
टोलीका अफिसियल प्रतिनिधिमा तिलक पाण्डे (ब्याडमिन्टन), ध्रुवबाबु थापा (गल्फ), देवकीमाया श्रेष्ठ (जुडो), भूपेश शाक्य (मुवाँथाई) र नयना शाक्य (पौडी) रहेका छन्।

टोलीलाई शुक्रबार यहाँ आयोजित बिदाइ समारोहका क्रममा राष्ट्रिय खेलकुद परिषद् (राखेप) का सदस्य–सचिव टङ्कलाल घिसिङ, युवा तथा खेलकुद मन्त्रालयका सहसचिव तथा राखेपका सदस्य रामचरित्र मेहता, राखेप कार्यकारी समितिका सदस्य कमलबहादुर भट्टराई र राष्ट्रिय टोली तयारी समितिका निर्देशक दीपक विष्टले सफलताको शुभकामना दिँदै बिदाइ गर्नुभयो।
राखेपका अनुसार मुवाँथाई टोली भोलि बहराइन प्रस्थान गर्ने कार्यक्रम छ।