संसद् विघटनविरुद्ध थप ५ रिट दर्ता, १६ पुगे

काठमाडौं। प्रतिनिधिसभा विघटनविरुद्ध आज थप ५ वटा रिट दर्ता भएका छन्। प्रधानमन्त्रीमा सुशीला कार्कीको नियुक्ति, प्रतिनिधिसभा विघटनलगायतविरुद्ध आइतबार थप ५ वटा रिट दर्ता भएका सर्वोच्च अदालतका प्रवक्ता अर्जुनप्रसाद कोइरालाले जानकारी दिनुभयो। योसँगै यस प्रकरणमा सर्वोच्च अदालतको संवैधानिक इजलासमा दर्ता हुने रिटको संख्या १६ पुगेको छ ।

प्रधानमन्त्रीमा कार्कीको नियुक्ति र उनले गरेको प्रतिनिधिसभा विघटन असंवैधानिक भएको भन्दै परेका रिटमा यही कात्तिक १२ गतेदेखि सुनुवाइ हुने छ ।

यसअघि अधिवक्ता डा. प्रेमराज सिलवाल, युवराज पौडेल, कीर्तिनाथ शर्मा पौडेल तथा आयुस बडाललगायतले सुशीला कार्कीको नियुक्ति बदर र प्रतिनिधिसभा पुनःस्थापनाको माग गर्दै रिट दिनुभएको थियो।

जेनजी आन्दोलनपछि राष्ट्रपति रामचन्द्र पौडेलले भदौ २७ गते कार्कीलाई प्रधानमन्त्री नियुक्त गर्नुभएको थियो। प्रधानमन्त्री कार्कीले सोही दिन प्रतिनिधिसभा विघटन गर्दै फागुन २१ गतेका लागि चुनावको मिति तोक्नुभएको थियो।