बंगलादेशसँग नेपालको हार

काठमाडौं । बंगलादेशको ढाकामा भइरहेको काभा कप पुरुष भलिबल (काभा कप फर मेन) को आफ्नो दोस्रो खेलमा घरेलु टोलीसँग पराजित भएको छ ।

ढाकास्थित इन्डोर हलमा बिहीबार भएको प्रतिस्पर्धात्मक र रोमाञ्चक खेलमा नेपाल बंगलादेशसँग ३-२ को सेटमा पराजित भयो ।

सुरुवाती तीन सेट निकै प्रतिस्पर्धात्मक बनेको थियो । जहाँ घरेलु टोली बंगलादेशले पहिलो सेट २५-२३ र दोस्रो सेट २५-२० ले आफ्नो पक्षमा पार्दै २-० को अग्रता बनाएको थियो । तर नेपाल खेलमा फर्कियो । प्रतिस्पर्धात्मक तेस्रो सेट नेपाल २५-२३ ले आफ्नो पक्षमा पार्दै पुनरागमन गरेको थियो । नेपालले चौथो सेट २५-१६ ले सहजै आफ्नो पक्षमा पार्दै खेल पाँचौ सेटसम्म पुर्‍यायो ।

पाँचौ तथा निर्णायक सेटमा बंगलादेशले सुरुवात देखि नै अग्रता बनाएको थियो। नेपालले पुनरागमन गर्दै अन्त्यतिर अग्रता पनि बनाएको थियो। १४-१३ को अवस्थामा नेपाल सेट प्वाइन्ट नजिक थियो। तर एक अंक जोड्न सकेन । बंगलादेशले लगातार तीन अंक जोडेर टाईब्रेकमा पाँचौ सेट १६-१४ ले आफ्नो पक्षमा पार्दै खेल जित्यो।