इरानसँग हार्यो नेपाली महिला टोली

काठमाडौं। नेपाल त्रिकोणात्मक अन्तर्राष्ट्रिय मैत्रीपूर्ण फुटबल प्रतियोगिताको आफ्नो पहिलो खेलमा आज इरानसँग ३-० ले पराजित भएको छ।

भारतको सिलोङमा भएको खेलको पहिलो हाफ गोलरहित बराबरीमा टुंगिएपनि दोस्रो हाफको सुरुवात मै नेपाल सम्हालिन सकेन । ८ मिनेट भित्र नेपालले ३ गोलको सामना गरेको थियो।

४९ औं मिनेटमा विमला विकलाई विट गर्दै इरानले गोलको खाता खोल्यो ‌। ५२ औं मिनेटमा फ्रिकिकमा इरानले गोल अन्तर दोब्बर पार्यो । ५७ औं मिनेटमा टाढैबाट गोल गर्दै इरानले ३-० को अन्तर बनायो ।

त्यसपछि एन्जिला तुम्बापो सुब्बाको सट्टा अन्जना राना मगरले पोष्ट सम्हालेकी थिइन्। प्रीति राई, कप्तान सावित्रा भण्डारी ‘साम्बा’ र रश्मिकुमारी घिसिङले गोल फर्काउन गरेको प्रयास सफल भएन ।

पहिलो हाफमा रेखा पौडेल र ‘साम्बा’ले समान १ मौका गुमाउँदा नेपालले अग्रता लिन सकेन। रेखाले ३० औं मिनेटमा गरेको प्रहार बाहिरियो भने पहिलो हाफको अन्त्यतिर साम्बा को प्रहारले पोष्टको दिशा लिन सकेन ।

१३ औं मिनेटमा इरानको खेलाडीको प्रहारलाई गोलकिपर एन्जिला तुम्बापो सुब्बाले रोकिन्। प्रतियोगिताको पहिलो खेलमा इरानले भारतलाई २-० ले हराएको थियो। इरानले लगातार दुई जितका साथ त्रिकोणात्मक सिरिज जितेको छ।

नेपाल र इरान ७ वर्षपछि एकअर्काको सामना गरेका हुन्। त्यतिबेला भारतमै भएको हिरो गोल्ड कपमा नेपालले इरानलाई ३-० ले हराएको थियो। साम्बाको २ र अनिताको १ गोलमा नेपाल विजयी भएको थियो।

प्रतियोगितामा नेपालले दोस्रो खेल मंगलवार भारतसँग खेल्नेछ। यी दुई खेल फिफा विन्डोको खेल हुन् । यो प्रतियोगितापछि कात्तिक १३ गते नेपाल र भारतबीच अर्को मैत्रीपूर्ण खेल हुनेछ।

आजको खेलमार्फत हिरा कुमारी भुजेल र दिपा शाहीलेले अन्तर्राष्ट्रिय फुटबल पुनरागमन गरेका छन्। हिरा पहिलो रोजाइमा खेलिन् । दोस्रो हाफमा हिराको ठाउँमा दिपा मैदान प्रवेश गरिन्। हिरा र दिपा दुबै साफ च्याम्पियनसिपमा चोटग्रस्त भएपछि मैदान बाहिर थिए।