रोहितको शतकमा यूएईलाई नेपालले दियो २३४ रनको लक्ष्य

काठमाडौं। कप्तान रोहितकुमार पौडेलको शतकप्रेरित नेपालले आइसीसी विश्वकप लिग-२ अन्तर्गतको त्रिकोणात्मक एकदिवसीय शृंखलामा घरेलु टोली संयुक्त अरब इमिरेट्स (युएई) सामू २३४ रनको लक्ष्य प्रस्तुत गरेको छ ।

दुबई अन्तर्राष्ट्रिय क्रिकेट मैदानमा टस जितेर ब्याटिङ रोजेको नेपालले निर्धारित ५० ओभरमा सबै विकेट गुमाउँदै २३३ रनको योगफल तयार पार्यो ।

नेपालका लागि रोहितले १३० बलमा पाँच चौका र दुई छक्काको मद्दतले सर्वाधिक १०९ रनको योगदान गरे । यसैगरी आसिफ शेखले ३५, आरिफ शेखले २७, दीपेन्द्रसिंह ऐरीले २३ र करण केसीले १३ रन बनाए ।

युएईका लागि र जाहिद अलीले चार, जुनैद सिद्धिकीले तीन तथा मोहम्मद रोहिद र हैदर अलीले समान एक विकेट लिए ।

दुवै टोली पहिलो जितको लक्ष्यमा छन् । पहिलो खेलमा नेपाल र युएई अमेरिकासँग पराजित भएका थिए ।