भिजिट भिसासम्बन्धी नयाँ मापदण्ड लागू

काठमाडौं। सरकारले भिजिट भिसासम्बन्धी नयाँ मापदण्ड जारी गरेको छ। गृह मन्त्रालयअन्तर्गतको अध्यागमन विभागले यसअघिको ६ बुँदे मापदण्ड खारेज गर्दै नयाँ ४ बुँदे मापदण्ड बिहीबारदेखि लागू गरेको हो।

विभागका अनुसार नयाँ मापदण्डले संविधानले प्रत्याभूत गरेका नागरिकका मौलिक हक, मानवअधिकार र स्वतन्त्र आवतजावतको अधिकारलाई सुनिश्चित गर्दै भिजिट भिसाको दुरुपयोग र स्वार्थ समूहको चलखेल नियन्त्रण गर्ने उद्देश्य राखेको छ।

अध्यागमन विभागले २०८० माघ १० देखि लागू गरिएको ६ बुँदे मापदण्ड र पछिल्ला समयमा जारी अन्य भिजिट भिसासम्बन्धी प्रावधानहरूलाई पूर्ण रूपमा खारेज गरेको जनाएको छ।

नयाँ मापदण्डअनुसार भिजिट भिसाका लागि अब निम्न मापदण्डहरू लागू हुनेछन् —

• कम्तीमा ६ महिना वैधता भएको राहदानी अनिवार्य हुनुपर्छ।
• सम्बन्धित देशको प्रवेशाज्ञा (Visa) वा ‘अन अराइभल’ भिसा सुविधा प्राप्त मुलुक भएमा प्रवेशाज्ञा नचाहिने।
• गन्तव्यसम्मको हवाई टिकट अनिवार्य पेश गर्नुपर्ने।

भ्रमणको प्रयोजनका लागि आवश्यक कागजात साथमा रहनुका साथै यात्राबाट उत्पन्न हुने परिणामप्रति स्वयं जिम्मेवार रहने स्वघोषणा गर्नुपर्ने।

विभागले यात्रुहरूलाई कुनै पनि बिचौलियाको प्रभावमा नपरी आफ्नो गन्तव्य र यात्राको उद्देश्यबारे पूर्णरूपमा जानकारी लिएर मात्रै यात्रा गर्न आग्रह गरेको छ।

अध्यागमन विभागले जारी विज्ञप्तिमा उल्लेख छ, “विदेश भ्रमण गर्दा सही जानकारीका साथ सचेत भएर यात्रा गर्नु नै सुरक्षित र जिम्मेवार नागरिकको परिचायक हो।”