राष्ट्र बैंकले दीर्घकालीन निक्षेप संकलन सुरु गर्यो

काठमाडौँ। बैंक तथा वित्तीय संस्थामा तत्काल कर्जा प्रवाहको अवस्था कम देखिएकाले नेपाल राष्ट्र बैंकले लामो अवधिका लागि निक्षेप संकलन सुरु गरेको छ। पछिल्ला दिनमा बजारमा कर्जाको माग कम देखिँदा बैंकहरुमा लगानीयोग्य रकम बढेको छ।

राष्ट्र बैंकले आइतबार ४० अर्ब रुपैयाँ दीर्घकालीन निक्षेप संकलन गर्ने तयारी गरेको छ। गत बुधबार पनि १७५ दिन अवधिको उपकरणमार्फत ४० अर्ब रुपैयाँ उठाइएको थियो। यसरी निक्षेप संकलनले बैंकिङ प्रणालीमा अतिरिक्त तरलता व्यवस्थापन गर्न मद्दत पुर्‍याउने राष्ट्र बैंकको भनाइ छ।

निक्षेप संकलनको बोलकबोल प्रक्रिया अनलाइन हुनेछ र ब्याजदर बोलकबोलमार्फत निर्धारण गरिनेछ। सहभागी हुन पाउने बैंक तथा वित्तीय संस्थाहरू ‘क’, ‘ख’ र ‘ग’ वर्गका मात्र हुन्।

केन्द्रिय बैंकले वित्तीय प्रणालीमा अत्यधिक तरलता व्यवस्थापन र ब्याजदर सन्तुलनका लागि यस्ता दीर्घकालीन निक्षेप उपकरण र स्थायी निक्षेप सुविधा नियमित प्रयोग गर्दै आएको छ।