कोरियन भाषा परीक्षा भोलिदेखि सुरु, ६७ हजारभन्दा बढीले दिने

काठमाडौँ। रोजगार अनुमति प्रणाली (ईपीएस) अन्तर्गत कोरियन भाषा परीक्षा भोलिदेखि उत्पादनमूलक क्षेत्रका लागि सुरु हुँदै छ। उत्पादनमूलक श्रेणीतर्फ ६७ हजार २९७ परीक्षार्थी सहभागी हुनेछन्। परीक्षा माघ २७ गतेसम्म दैनिक रूपमा सञ्चालन हुनेछ। ईपीएस शाखाका अनुसार यो वर्षको भाषा परीक्षाका लागि एक लाख २ हजार ५६४ जनाले आवेदन दिएका थिए। आवेदन साउन २६ देखि ३१ गतेसम्म खुला गरिएको थियो। यो परीक्षाबाट करिब ५ हजार ३ सय जना उत्तीर्ण हुने अनुमान गरिएको छ।
त्यसमध्ये—
– उत्पादनमूलक क्षेत्र : ३,५०० जना
– कृषि तथा पशुपालन क्षेत्र : १,८०० जना
एक दिनमा ५ सिफ्टसम्म परीक्षा सञ्चालन गरिने व्यवस्था मिलाइएको शाखाले जनाएको छ।
दक्षिण कोरियाले रोजगार अनुमति प्रणाली (eps) मार्फत कामदार भर्ना गर्न सन् २००७ मा नेपालसँग एमओयू गरेको थियो। त्यसपछि सन् २००८ देखि कोरियाले नेपालबाट नियमित रूपमा कामदार लैजाने प्रक्रिया सुरु गर्यो।