रास्वपाबाट बाहिरिनेहरूलाई कुनै कटुता छैन : उपसभापति वाग्ले

काठमाडौं। राष्ट्रिय स्वतन्त्र पार्टी (रास्वपा) का उपसभापति स्वर्णिम वाग्लेले पार्टी छाडेका नेताहरूप्रति कुनै पनि प्रकारको कटुता नराखी उनीहरूले पुर्‍याएको योगदानको कदर गर्दै धन्यवाद व्यक्त गरिएको बताउनु भएको छ।

मंगलबार नख्खु कारागारमा सभापति रवि लामिछानेलाई भेटेपछि सञ्चारकर्मीसँग कुरा गर्दै वाग्लेले केही नेता बाहिरिए पनि पार्टीमा प्रवेश गर्न चाहनेहरूको ‘ओइरो’ लागेको दाबी गर्नुभयो । हालै सुमना श्रेष्ठ र सन्तोष परियार जस्ता प्रभावशाली नेताहरूले पार्टी त्यागेको प्रसंगमा बोल्दै उहाले रास्वपाले यसलाई स्वाभाविक प्रक्रियाका रूपमा लिएको बताउनुभयो।

उहाका अनुसार पार्टीले काँटछाँटको रूपमा होइन, एक सुसंस्कृत राजनीतिक संस्कारका रूपमा यसलाई हेरेको हो।
वाग्लेले भन्नुभयो , “जानुभएका एक-दुई जना पात्रहरूको बारेमा हाम्रो पार्टीको स्पष्ट लाइन छ— उहाँहरूले पार्टीमा रहँदा पुर्‍याउनुभएको योगदानका लागि दुई हात जोडेर धन्यवाद। उहाँहरूको आगामी राजनीतिक यात्राको लागि शुभकामना।”
उहाले बाहिरिने क्रमलाई गौण ठहर गर्दै अहिले पार्टीमा प्रवेश गर्न चाहनेहरूको संख्या तीव्र रूपमा बढेको बताउनुभयो । सभापति लामिछानेसँगको भेटमा पनि नयाँ व्यक्ति, समूह र दलहरू पार्टीमा प्रवेश गर्न इच्छुक भएको विषयमा विस्तृत छलफल भएको उहाँले बताउनुभयो ।

“आज धेरै समय पार्टीमा को–को आउन चाहनुभएको छ भन्ने विषयमा छलफल भयो,” वाग्लेले भन्नु भयो , “आउनेहरूको ओइरोको बारेमा बिस्तारै थाहा हुँदै जान्छ।” वाग्लेले रास्वपा हालैको ‘ठूलो आँधीबेहरी’ पछिको अवस्थाबाट थप खारिएर निस्किएको दाबी गर्दै अहिले सापेक्ष रूपमा सबैभन्दा सङ्लो राजनीतिक शक्तिको रूपमा स्थापित भएको दाबी गर्नुभयो ।