विराटनगरले पोखरालाई दियो एनपीएल इतिहासकै सर्वाधिक ठूलो लक्ष्य

काठमाडौं। लोकेश बम र मार्टिन गप्टिलको उत्कृष्ट प्रदर्शनप्रेरित विराटनगर किंग्सले नेपाल प्रिमियर लिग (एनपीएल) मा पोखरा एभेन्जर्सविरुद्ध २ सय २१ रनको लक्ष्य प्रस्तुत गरेको छ ।

कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको विराटनगरले निर्धारित २० ओभरमा ६ विकेट गुमाउँदै २ सय २० रनको योगफल तयार पारेको थियो ।

यो एनपीएलको इतिहासकै सर्वाधिक रनको योगफल हो । विराटनगरका लागि लोकेशले ४८ बलमा ७ छक्का र १ चौकासहित सर्वाधिक ७२ रनको योगदान गरे । यसैगरी गप्टिलले ३५ बलमा पाँच छक्का र तीन चौकाको मद्दतले ६१, शुवम रन्जानेले ३८, बसिर अहमदले २३, नरायाण जोशीले अविजित ११ र जर्ज मुन्सेले १० रन बनाए ।

दोस्रो विकेटका लागि लोकेश र गप्टिलबीच १ सय ३२ रनको साझेदारी भएको थियो । यो साझेदारीलाई सागर ढकालले तोडेका थिए ।

पोखराका लागि म्याट टेलरले दुई तथा आकश चन्द, सागर ढकाल र कप्तान कुशल भुर्तेलले समान एक विकेट लिए ।