काठमाडौंमाथि विराटनगरको सानदार जित

काठमाडौं। विराटनगर किंग्सले नेपाल प्रिमियर लिग (एनपीएल) को दोस्रो संस्करणमा लगातार दोस्रो जित निकालेको छ । विराटनगरले लिगअन्तर्गत शनिबारको दोस्रो खेलमा काठमान्डु गोर्खाजविरुद्ध पाँच विकेटको जित निकालेको हो ।

कीर्तिपुरस्थित त्रिवि क्रिकेट रंगशालामा सम्पन्न खेलमा काठमान्डुले प्रस्तुत गरेको १३५ रनको मध्यम लक्ष्य विराटनगरले १७.१ ओभरमा पाँच विकेट गुमाएर पूरा गर्यो ।

विराटनगरको जितमा ओपनर जर्ज मुन्सेले सर्वाधिक ३६ रन बनाए । उनले १६ बलमा पाँच चौका र दुई छक्का प्रहार गरे । मार्टिन गप्टिलले १९ बलमा दुई चौका र एक छक्का प्रहार गरे ।

यी दुईले २१–१ को स्थितीबाट दोस्रो विकेटका निम्ति ५३ रनको साझेदारी गर्दै विराटनगरलाई जित नजिक डोहोर्याएका थिए । बसिर अहमेदले १७ बलमा एक चौका र एक छक्कासहित १९ रन जोडे । नरेन भट्टले २४ र ओपनर लोकेश बमले १० बलमा दुई छक्कासहित १४ रन बनाए ।

काठमान्डुका साहब आलमले दुई विकेट लिए । उनले चार ओभरमा १९ रनमात्र खर्चिए । कप्तान करण केसी, गेरहार्ड इरास्मस र सन्तोष यादवले समान एक विकेट लिए ।

त्यसअघि टस हारेर ब्याटिङमा आएको काठमान्डुले निर्धारित २० ओभरमा ६ विकेट गुमाएर १३४ रनको योगफल खडा गरेको थियो ।

काठमान्डुका अलराउन्डर आदील आलम अन्सारी सर्वाधिक ४८ रन बनाए । उनले २५ बलमा तीन चौका र दुई छक्का प्रहार गरे ।

सन्तोष यादवले ३४ बलमा एक छक्कासहित २६ रन बनाए । आदील र सन्तोषले ५६–५ को नाजुक स्थितीबाट ४५ रनको साझेदारी गर्दै काठमान्डुलाई सम्मानजनक स्कोरसम्म पूर्याएका थिए ।

ओपनर बेन चाल्र्सवर्थले ३३ बलमा एक चौका र दुई छक्कासहित ३२ रन जोडे । गेरहार्ड इरास्मसले १० रन थपे । काठमान्डुका अरु ब्याटर दोहोरो अंकसम्म पुग्न सकेनन् ।

त्यसअघि काठमान्डुले ओपनर आकाश त्रिपाठीलाई शून्य, रिकार्डो भास्कोन्सेलोसलाई तीन र प्रतिक श्रेष्ठलाई दुई रनमा गुमाएको थियो ।

काठमान्डुलाई मध्यम योगफलमा रोक्न विराटनगरका मर्चेन्ट डी लाङ्गेले दुई विकेट लिए । चार ओभरमा उनले १७ रनमात्र खर्चिए । सूर्य तामाङ, सुभम रन्जाने र कप्तान सन्दीप लामिछानेले समान एक विकेट लिए ।

प्रतियोगितामा काठमान्डुको यो तेस्रो र विराटनगरको दोस्रो खेल हो । लगातार दुई जितसँगै विराटनगरले चार अंक जोडेको छ । विराटनगरले पहिलो खेलमा पोखरा एभेन्जर्सविरुद्ध ५३ रनको जित निकालेको थियो ।

यता, तीन खेलमा दोस्रो हार बेहोरेको काठमान्डुले भने दुई अंकमात्र जोडेको छ । यसअघि काठमान्डुले पहिलो खेलमा साविक विजेता जनकपुर बोल्ट्सलाई पाँच विकेटले हराएको थियो । तर, दोस्रो खेलमा भने काठमान्डु सुदूरपश्चिम रोयल्ससँग २९ रनले पराजित भएको थियो