गैरआवासीय नेपाली संघको आइतबार एकता घोषणा हुने, फेब्रुअरीमा १२ औं महाधिवेशन

काठमाडौं। लामो समयदेखि विवाद र विभाजनमा फसेको गैरआवासीय नेपाली संघ (एनआरएनए) अब एकीकृत हुने भएको छ । संघको आइतबार काठमाडौंमा एकता घोषणा कार्यक्रम गर्न लागिएको हो।

करिब चार वर्षदेखि विभाजनमा रहेको संघको डा. बद्री केसी र महेश श्रेष्ठले छुट्टाछुट्टै नेतृत्व गरिरहेका छन् । १० औँ महाधिवेशनबाट शुरु भएको सदस्यतासम्बन्धी विवादले संघ विभाजनमा पुगेको थियो । हाल दुवै संघका अध्यक्ष संघलाई एकतावद्ध गर्न तयार हुनुभएको छ ।

डा. केसी नेतृत्वका संघका उपमहासचिव तथा वार्ता समिति सदस्य सोम सापकोटाले करिब चार वर्षदेखि चल्दै आएको आन्तरिक विवाद अन्त्य गरी संघले आइतबार बृहत एकता घोषणा गर्न लागेको जानकारी दिनुभयो ।

सापकोटाकाअनुसार आइतबार प्रधानमन्त्री सुशीला कार्कीको रोहवरमा बृहत एकता घोषणा हुन लागेको हो। एनआरएनए विदेशमा रहेका नेपालीहरूको साझा संस्था भएकाले यसको दर्ता परराष्ट्र मन्त्रालयअन्तर्गत रहेको छ। हाल परराष्ट्र मन्त्रालयको जिम्मेवारी प्रधानमन्त्रीले नै सम्हाल्नुभएको कारण उहाँको उपस्थितिमा एकता घोषणा गर्न लागिएको सापकोटाले जानकारी दिनुभयो।

उहाँले गैरआवसीय नेपालीहरुको चाहना  र भावनाअनुसार नै एकता गर्न लागिएको जानकारी दिनुभयो ।  १० औँ महाधिवेशनमा पञ्जीकृत सदस्य र प्रतिनिधि निर्धारण सम्बन्धि विधानको पालना गर्न नसक्दा विवाद उत्पन्न भएको थियो । विधानअनुसार हरेक १० पञ्जीकृत सदस्यमा १ प्रतिनिधि तोकिने व्यवस्था रहेपनि केही देशमा उक्त प्रक्रिया अवलम्बन नगरिएकाले समस्या भएको थियो।

एनसीसी विवाद मिलाउन समय दिइने, फेब्रुअरी अन्तिममा १२ औँ महाधिवेशन

संघको अन्तराष्ट्रिय सम्वन्वयन परिषद्मा देखिएको विभाजनपछि केही केही देशमा एनसीसी (राष्ट्रिय समन्वय परिषद्) हरू पनि विभाजित बनेका छन् । दुई वटा एनसीसी रहेका देशमा एकता प्रक्रियाका लागी समय दिईने दिइने छ।

विधानअनुसार सदस्यता लिएका र पञ्जीकृत सदस्यलाई महाधिवेशनमा सहभागी गराइने र कसैलाई अन्याय नहुने जनाइएको छ । फेब्रुअरी अन्तिममा १२ औँ अन्तर्राष्ट्रिय महाधिवेशन तथा निर्वाचन सम्पन्न गर्ने लक्ष्य राखिएको छ।

समग्र गैरआवासीय नेपालीको ईच्छाअनुसार भएका कमीकमजोरीहरुलाई सुधार्दै अब एनआरएनए एकतावद्ध हुने बताइएको छ।